ប្រធានាធិបតីសហរដ្ឋអាមេរិក លោក Donald Trump បានប្រកាសកញ្ចប់ជំនួយចំនួន១២ពាន់លានដុល្លារដើម្បីជួយកសិករដែលរងផលប៉ះពាល់ដោយគោលនយោបាយដំឡើងពន្ធដ៏តឹងរ៉ឹងរបស់លោក។ លោក Trump បានប្រកាសកញ្ចប់នេះនៅក្នុងព្រឹត្តិការណ៍មួយនៅសេតវិមានកាលពីថ្ងៃចន្ទ ដោយនិយាយថាជំនួយនេះនឹងបានមកពីមូលនិធិដែលប្រមូលបានដោយការដំឡើងពន្ធ។

លោក Trump បាននិយាយថា «អ្វីដែលយើងកំពុងធ្វើ គឺយើងកំពុងដកយកចំណែកតូចមួយនៃចំនួននោះ ហើយយើងនឹងផ្តល់ជំនួយសេដ្ឋកិច្ចដល់កសិករ»។

ចាប់តាំងពីឡើងកាន់តំណែងមក លោក Trump បានប្រើប្រាស់អំណាចបន្ទាន់ដើម្បីបន្តរបៀបវារៈដំឡើងពន្ធដ៏ទូលំទូលាយ រួមទាំងការដាក់ពន្ធបដិការលើពាណិជ្ជកម្មស្ទើរតែទាំងអស់របស់សហរដ្ឋអាមេរិក និងបង្កើនសង្គ្រាមពាណិជ្ជកម្មជាមួយប្រទេសចិន។

ខណៈទីក្រុងវ៉ាស៊ីនតោន និងទីក្រុងប៉េកាំង បានចាប់ផ្តើមបន្ធូរបន្ថយភាពតានតឹងមួយចំនួនរបស់ខ្លួន ការសងសឹកគ្នាទៅវិញទៅមកបានបង្កើតជាឆ្នាំដ៏លំបាកសម្រាប់កសិករ។ ទោះបីជាមានការប្រមូលផលខ្ពស់នៅសហរដ្ឋអាមេរិកក៏ដោយ ប្រទេសចិនបានងាកទៅរកអាមេរិកខាងត្បូងកាន់តែខ្លាំងឡើងសម្រាប់ផលិតផលកសិកម្ម ជាពិសេសសណ្តែកសៀង និងស្ពៅ។ វាក៏បានប្រឈមទៅនឹងតម្លៃគ្រាប់ពូជ និងជីខ្ពស់ជាផលប៉ះពាល់នៃការដំឡើងពន្ធផងដែរ។