ក្រុមបំបែកខ្លួននៅភាគខាងត្បូងប្រទេសយេម៉ែន បានអះអាងការគ្រប់គ្រងដ៏ទូលំទូលាយនៅភាគខាងត្បូងប្រទេស ជាការផ្លាស់ប្តូរដ៏សំខាន់មួយក្នុងអំណាចសម្រាប់តំបន់នោះ។

លោក Amr al-Bidh មន្ត្រីជាន់ខ្ពស់នៃក្រុមប្រឹក្សាអន្តរកាលភាគខាងត្បូង (STC) បានប្រាប់ទីភ្នាក់ងារសារព័ត៌មាន Reuters កាលពីថ្ងៃចន្ទថា ក្រុមនេះបានពង្រីកវត្តមានរបស់ខ្លួននៅខេត្តភាគខាងត្បូង រួមទាំងកំពង់ផែ Aden ជាមូលដ្ឋានរបស់រដ្ឋាភិបាលដែលត្រូវបានទទួលស្គាល់ជាអន្តរជាតិក្នុងរយៈពេលមួយទសវត្សរ៍កន្លងទៅនេះ។

លោក al-Bidh បាននិយាយតាមរយៈសារជាអក្សរថា ខេត្តភាគខាងត្បូងចំនួន៨ «ស្ថិតនៅក្រោមការការពាររបស់កងកម្លាំងប្រដាប់អាវុធភាគខាងត្បូង»។ «យើងកំពុងផ្តោតសំខាន់លើការបង្រួបបង្រួមឆាកប្រតិបត្តិការនៃកងកម្លាំងប្រដាប់អាវុធរបស់យើងដើម្បីបង្កើនការសម្របសម្រួល និងការត្រៀមខ្លួនពង្រឹងស្ថិរភាព និងសន្តិសុខនៅភាគខាងត្បូង ព្រមទាំងការប្រយុទ្ធប្រឆាំងក្រុមហ៊ូទី»។

ការរុលទៅមុខរបស់ក្រុមប្រឹក្សាអន្តរកាលភាគខាងត្បូង(STC) បង្ហាញការផ្លាស់ប្តូរដ៏សំខាន់ក្នុងការគ្រប់គ្រងនៅភាគខាងត្បូងប្រទេសយេម៉ែន។ ក្រុមនេះបានស្វែងរកស្វ័យភាពកាន់តែច្រើនសម្រាប់ភាគខាងត្បូង ជារដ្ឋឯករាជ្យរហូតដល់ការបង្រួបបង្រួមជាមួយភាគខាងជើងក្នុងឆ្នាំ១៩៩០។

ក្រុមប្រឹក្សាអន្តរកាលភាគខាងត្បូង (STC) ដែលត្រូវបានគាំទ្រកាលពីពេលមុនដោយប្រទេសអារ៉ាប់រួមក្នុងអំឡុងពេលសង្គ្រាមស៊ីវិលរយៈពេលមួយទសវត្សរ៍របស់ប្រទេសយេម៉ែន បានប៉ះទង្គិចជាមួយក្រុមផ្សេងទៀតនៅក្នុងរដ្ឋាភិបាលគាំទ្រដោយប្រទេសអារ៉ាប៊ីសាអ៊ូឌីត ដែលបានផ្លាស់ទីតាំងទៅទីក្រុង Aden បន្ទាប់ពីក្រុមហ៊ូទីដែលជាសម្ព័ន្ធមិត្តរបស់អ៊ីរ៉ង់ បានដណ្តើមយករដ្ឋធានីសាណាក្នុងឆ្នាំ២០១៤។