អ្នកគាំទ្រប្រធានាធិបតី លោក Patrice Talon បានមកប្រមូលផ្តុំគ្នានៅទីក្រុង Cotonou កាលពីថ្ងៃចន្ទ ទី ៨ ខែធ្នូ ដើម្បីអង្គុយតវ៉ា រិះគន់ការប៉ុនប៉ងធ្វើរដ្ឋប្រហារកាលពីមួយថ្ងៃមុន។ ប្រជាជន បានកាន់បដាដែលមានអំណានថា «លែងមានរដ្ឋប្រហារនៅប្រទេសបេណាំងទៀត» ខណៈក្រុមអ្នករៀបចំ បានដឹកនាំការស្រែករិះគន់អ្វីដែលពួកគេបានពិពណ៌នាថាជាជនក្លែងបន្លំនិងឃាតករនៅពីក្រោយព្រឹត្តិការណ៍កាលពីថ្ងៃអាទិត្យ។

រដ្ឋាភិបាលប្រទេសបេណាំងបាននិយាយកាលពីថ្ងៃចន្ទថា ទាហានដែលបះបោរបានព្យាយាមចាប់ខ្លួន លោកTalon និងបានចាប់ពង្រត់មន្ត្រីយោធាជាន់ខ្ពស់ពីរនាក់ ប៉ុន្តែត្រូវបានដោះលែងវិញនៅព្រឹកបន្ទាប់។ អាជ្ញាធរបាននិយាយថា យន្តហោះចម្បាំងរបស់ប្រទេសនីហ្សេរីយ៉ា បានធ្វើការវាយប្រហារតាមអាកាសដើម្បីជួយរារាំងការប៉ុនប៉ងនោះ បន្ទាប់ពីទីក្រុង Abuja បានដាក់ពង្រាយកងកម្លាំងទ័ពអាកាស និងដីគោកដើម្បីគាំទ្រប្រទេសបេណាំង។

នៅក្នុងបាតុកម្មអង្គុយតវ៉ា អ្នកគ្រប់គ្រងអាជីវកម្ម លោក Roland Deguenon បាននិយាយថា ប្រទេសបេណាំង ត្រូវបានគេស្គាល់ដោយសារស្ថិរភាពរបស់ប្រទេស ហើយប្រទេសនេះ «ស្ទើរតែប្រែទៅជាភាពងងឹត»។ លោកបានសរសើរអន្តរាគមន៍របស់ប្រទេសនីហ្សេរីយ៉ា និងសាមគ្គីភាពរបស់អាហ្វ្រិកខាងលិច ។

ក្រុមបាតុករផ្សេងទៀតបាននិយាយថា ពួកគេបានចល័តដើម្បីច្រានចោលអំណាចដែលដណ្តើមយកដោយប្រើប្រាស់កម្លាំង។ សហគ្រិន លោក Anique Djimadja បាននិយាយថា ប្រជាជនបានមកប្រមូលផ្តុំគ្នា «ជាមនុស្សតែម្នាក់» ដើម្បីការពារសមិទ្ធផលប្រជាធិបតេយ្យ ខណៈសមាជិកសភា លោក Orden Alladatin បានចាត់ទុកវាថាជា «រដ្ឋប្រហារមានរយៈពេលខ្លីបំផុត» ។