កងកម្លាំងគាំទ្ររហ័សយោធាប៉ារ៉ា(RSF) និយាយថា ខ្លួនដណ្តើមយកបានតំបន់ប្រេង Heglig ដ៏សំខាន់នៅក្នុងខេត្ត South Kordofan ប្រទេសស៊ូដង់។

ការអះអាង កាលពីថ្ងៃចន្ទត្រូវបានបញ្ជាក់នៅពេលក្រោយមកដោយសេចក្តីថ្លែងការណ៍មួយចេញផ្សាយដោយកងកម្លាំងប្រដាប់អាវុធស៊ូដង់(SAF)របស់រដ្ឋាភិបាលយោធា ដោយនិយាយថា ខ្លួនបានដកថយចេញពីតំបន់នោះ។ ការដណ្តើមយកនេះ កើតឡើងនៅពេលដែលកងកម្លាំងប្រដាប់អាវុធស៊ូដង់ ជាប់ពាក់ព័ន្ធក្នុងជម្លោះរយៈពេលពីរឆ្នាំកន្លះជាមួយកងកម្លាំងគាំទ្ររហ័ស(RSF) ដែលកំពុងជំរុញពង្រីកទៅភាគខាងកើត និងខាងត្បូងពីតំបន់ Darfur ភាគខាងលិច ដែលខ្លួនបានគ្រប់គ្រងពេញលេញកាលពីខែមុន។

លោក Youssef Alian ប្រធាន «រដ្ឋបាលស៊ីវិល» ជាប់ពាក់ព័ន្ធជាមួយកងកម្លាំងគាំទ្ររហ័ស នៅក្នុងតំបន់ដែលអណ្តូងប្រេងស្ថិតនៅ បានអះអាងនៅក្នុងសេចក្តីថ្លែងការណ៍ថា លោកបានជួយ «រៀបចំកម្លាំងពិសេស មានសមត្ថភាព និងបានទទួលការបណ្តុះបណ្តាល ដើម្បីធានាបានសុវត្ថិភាពតំបន់ Heglig និងការពារទីតាំងប្រេងពីសកម្មភាពបំផ្លិចបំផ្លាញ ឬការគំរាមកំហែងណាមួយដែលអាចធ្វើឲ្យប៉ះពាល់ដល់សុវត្ថិភាពរបស់វា»។

វាលប្រេង Heglig គឺជាទីតាំងដំណើរការប្រេងធំបំផុតរបស់ប្រទេសស៊ូដង់ ហើយក៏ជាកន្លែងដំណើរការប្រេងដ៏សំខាន់សម្រាប់ការនាំចេញប្រេងរបស់ប្រទេសស៊ូដង់ខាងត្បូងដែលនៅជិតខាងផងដែរ។ កងកម្លាំងគាំទ្ររហ័ស(RSF) បាននិងកំពុងចល័តកងទ័ពដើម្បីដណ្តើមយកតំបន់ជាច្រើនទៀតនៅភាគខាងត្បូង និងភាគកណ្តាលប្រទេសស៊ូដង់។