យោធាអ៊ីស្រាអែលបាននិយាយនៅថ្ងៃអង្គារនេះថា ខ្លួនបានវាយប្រហារហេដ្ឋារចនាសម្ព័ន្ធដែលជាកម្មសិទ្ធិរបស់ក្រុមហេសបូឡានៅក្នុងតំបន់ជាច្រើន នៅភាគខាងត្បូងប្រទេសលីបង់ រួមទាំងអ្វីដែលខ្លួនពិពណ៌នាថា ជាបរិវេណហ្វឹកហាត់ដែលប្រើប្រាស់ដោយកងកម្លាំង Radwan របស់ក្រុមប្រដាប់អាវុធនេះ។

យោធាបានបន្ថែមនៅក្នុងសេចក្តីថ្លែងការណ៍មួយថា រចនាសម្ព័ន្ធយោធា និងទីតាំងដាក់ជើងទម្របាញ់រ៉ូកែត ដែលជាកម្មសិទ្ធិរបស់ក្រុមហេសបូឡា ក៏ត្រូវបានវាយប្រហារផងដែរ។

ការវាយប្រហារទាំងនេះ បានកើតឡើងមិនដល់មួយសប្តាហ៍បន្ទាប់ពីអ៊ីស្រាអែល និងលីបង់ បានបញ្ជូនបេសកជនស៊ីវិលទៅកាន់គណៈកម្មាធិការយោធាដែលតាមដានបទឈប់បាញ់របស់ពួកគេ ជាជំហានមួយឆ្ពោះទៅរកការទាមទាររបស់សហរដ្ឋអាមេរិកអស់រយៈពេលជាច្រើនខែ ដែលប្រទេសទាំងពីរត្រូវពិភាក្សាគ្នាយ៉ាងទូលំទូលាយ ស្របតាមរបៀបវារៈសន្តិភាពមជ្ឈិមបូព៌ារបស់លោកប្រធានាធិបតី ដូណាល់ ត្រាំ។

អ៊ីស្រាអែល និងលីបង់បានយល់ព្រមលើបទឈប់បាញ់ដែលសម្របសម្រួលដោយសហរដ្ឋអាមេរិក ក្នុងឆ្នាំ ២០២៤ ដែលបានបញ្ចប់ការប្រយុទ្ធគ្នាជាងមួយឆ្នាំរវាងអ៊ីស្រាអែល និងក្រុមហេសបូឡា។ ចាប់តាំងពីពេលនោះមក ពួកគេបានចោទប្រកាន់គ្នាទៅវិញទៅមកចំពោះការរំលោភបំពានបទឈប់បាញ់។

ទីភ្នាក់ងារសារព័ត៌មានរដ្ឋលីបង់ NNA បានរាយការណ៍ថា យន្តហោះចម្បាំងអ៊ីស្រាអែលបានធ្វើការវាយប្រហារតាមអាកាសជាបន្តបន្ទាប់ ដោយកំណត់គោលដៅកន្លែងជាច្រើន នៅភាគខាងត្បូងប្រទេសលីបង់៕