អង្គការអ្នកសារព័ត៌មានគ្មានព្រំដែន (RSF) បាននិយាយនៅថ្ងៃអង្គារនេះថា អ៊ីស្រាអែលទទួលខុសត្រូវចំពោះការសម្លាប់ជិតពាក់កណ្តាលនៃអ្នកកាសែតនៅទូទាំងពិភពលោក នៅឆ្នាំនេះ ដោយមានអ្នកសារព័ត៌មានប៉ាឡេស្ទីនចំនួន ២៩ នាក់ ត្រូវបានសម្លាប់ដោយកងកម្លាំងរបស់ខ្លួន នៅតំបន់ហ្កាហ្សា។ 

នៅក្នុងរបាយការណ៍ប្រចាំឆ្នាំរបស់ខ្លួន ក្រុមសេរីភាពប្រព័ន្ធផ្សព្វផ្សាយដែលមានមូលដ្ឋាននៅទីក្រុងប៉ារីសបានអះអាងថា ចំនួនសរុបនៃអ្នកសារព័ត៌មាន ដែលត្រូវបានសម្លាប់បានឈានដល់ ៦៧ នាក់ នៅទូទាំងពិភពលោក នៅឆ្នាំនេះ កើនឡើងបន្តិចពី ៦៦ នាក់ ដែលត្រូវបានសម្លាប់ក្នុងឆ្នាំ ២០២៤។

RSF បាននិយាយនៅក្នុងរបាយការណ៍របស់ខ្លួន ដែលបានកត់ត្រាការស្លាប់ ក្នុងរយៈពេល ១២ ខែគិតចាប់ពីខែធ្នូ ឆ្នាំ ២០២៤ថា កងកម្លាំងអ៊ីស្រាអែលមានចំនួន ៤៣ ភាគរយនៃចំនួនសរុប ដែលធ្វើឲ្យពួកគេក្លាយជា «សត្រូវដ៏អាក្រក់បំផុតរបស់អ្នកកាសែត»។

ការវាយប្រហារតែមួយដ៏សាហាវបំផុត គឺការវាយប្រហារដែលគេហៅថា «ការទម្លាក់គ្រាប់បែកពីរលើក» ទៅលើមន្ទីរពេទ្យមួយ នៅភាគខាងត្បូងហ្កាហ្សានៅថ្ងៃទី ២៥ ខែសីហា ដែលបានសម្លាប់អ្នកកាសែតចំនួន ៥នាក់ ក្នុងនោះមានអ្នកយកព័ត៌មានពីរនាក់របស់ទីភ្នាក់ងារព័ត៌មានអន្តរជាតិ Reuters និង AP។

ទិន្នន័យរបស់ RSF បង្ហាញថា សរុបមក ចាប់តាំងពីការចាប់ផ្តើមនៃអរិភាពនៅតំបន់ហ្កាហ្សា ក្នុងខែតុលា ឆ្នាំ២០២៣ អ្នកសារព័ត៌មានជិត ២២០នាក់ បានស្លាប់ ដែលធ្វើឲ្យអ៊ីស្រាអែលក្លាយជាឃាតករ    សម្លាប់អ្នកកាសែតច្រើនបំផុត នៅទូទាំងពិភពលោក ក្នុងរយៈពេលបីឆ្នាំជាប់ៗគ្នា៕