ប្រភពពីមន្រ្តីនគរបាល និងសន្តិសុខ បាននិយាយក្នុងថ្ងៃអង្គារ (៩ ធ្នូ) នេះថា ក្រុមសកម្មប្រយុទ្ធបានសម្រុកចូលប៉ុស្តិ៍ត្រួតពិនិត្យសន្តិសុខមួយនៅភាគពាយព្យនៃប្រទេសប៉ាគីស្ថាន ក្បែរព្រំដែនអាហ្វហ្គានីស្ថាន ដោយបានសម្លាប់ទាហានយ៉ាងតិច ៦នាក់ និងមួយចំនួនទៀតរងរបួស។

ការវាយប្រហារនៅក្នុងអតីតស្រុកកុលសម្ព័ន្ធ Kurram នេះ កើតឡើងនៅពេលដែលប៉ាគីស្ថាន និងអាហ្វហ្គានីស្ថាន ជួបការលំបាកក្នុងការរក្សាបទឈប់បាញ់ដ៏ផុយស្រួយ បន្ទាប់ពីការប៉ះទង្គិចតាមព្រំដែនបានសម្លាប់មនុស្សរាប់សិបនាក់ ក្នុងខែតុលា ដែលជាការប្រយុទ្ធដ៏អាក្រក់បំផុតរបស់អ្នកជិតខាងទាំងពីរ ចាប់តាំងពីពួកតាលីបង់ កាន់កាប់ទីក្រុងកាប៊ុល ក្នុងឆ្នាំ២០២១ មក។

ទីក្រុងអ៊ីស្លាម៉ាបាដ បានស្តីបន្ទោសកំណើនហិង្សានៅប៉ាគីស្ថាន ដាក់លើខ្លួនក្រុមសកម្មប្រយុទ្ធ ដែលប្រើប្រាស់ទឹកដីអាហ្វហ្គានីស្ថាន ដើម្បីរៀបចំផែនការវាយប្រហារលើកងកម្លាំងសន្តិសុខឆ្លងព្រំដែន។ ប៉ុន្តែទីក្រុងកាប៊ុលបានបដិសេធ ដោយនិយាយថា សន្តិសុខប៉ាគីស្ថាន ជាបញ្ហាផ្ទៃក្នុងរបស់ខ្លួនប៉ុណ្ណោះ។

ពុំទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះទេ។ បន្ទាត់ព្រំដែនតំបន់ភ្នំរបស់ប្រទេសទាំងពីរនេះ គឺជាជម្រករបស់ពួកសកម្មប្រយុទ្ធអ៊ិស្លាមនិយម មកពីក្រុម Tehreek-e-Taliban (TTP) ដែលត្រូវគេស្គាល់ថាជា ក្រុមតាលីបង់ប៉ាគីស្ថាន ដែលបានធ្វើសង្រ្គាមប្រឆាំងនឹងរដ្ឋ អស់ជិត ២០ឆ្នាំមកហើយ៕