បុគ្គលិកដែលធ្វើការនៅសារមន្ទីរលូវ៉ា (Louvre) ដ៏ល្បីល្បាញរបស់បារាំង កាលពីថ្ងៃចន្ទ (៨ ធ្នូ) បានបោះឆ្នោតគាំទ្រឱ្យធ្វើកូដកម្ម ដើម្បីតវ៉ានឹងលក្ខខណ្ឌការងាររបស់ពួកគេ ការដំឡើងថ្លៃសំបុត្រសម្រាប់ភ្ញៀវដែលមិនមែនជាជនជាតិអឺរ៉ុប និងភាពទន់ខ្សោយផ្នែកសន្តិសុខ បន្ទាប់ពីចោរកម្មគ្រឿងអលង្ការដ៏កក្រើករបស់ប្រទេសបារាំង កាលពីខែតុលា។

ក្នុងលិខិតមួយច្បាប់ ដែលផ្ញើជូនរដ្ឋមន្ត្រីក្រសួងវប្បធម៌បារាំង បានបង្ហាញថា សកម្មភាពកូដកម្មនឹងចាប់ផ្តើមពីថ្ងៃចន្ទ ទី១៥ ខែធ្នូ សប្ដាហ៍ក្រោយនេះ ដោយសហជីព CGT សហជីព CFDT និង Sud បានអះអាងថា "ការទៅទស្សនាសារមន្ទីរលូវ៉ា បានក្លាយជាឧបសគ្គយ៉ាងពិតប្រាកដ" សម្រាប់មនុស្សរាប់លាននាក់ ដែលទៅទស្សនាបណ្ដុំសិល្បៈ និងវត្ថុបុរាណប្រវត្តិសាស្រ្តដ៏ធំនៅទីនោះ។

លិខិតជូនដំណឹងពីកូដកម្មនេះបាននិយាយថា សារមន្ទីរកំពុងស្ថិតក្នុង "វិបត្តិ" ជាមួយនឹងធនធានមិនគ្រប់គ្រាន់ និង "លក្ខខណ្ឌការងារកាន់តែយ៉ាប់យ៉ឺន"។ សហជីពទាំងនោះក៏ចោទប្រកាន់ថា "ចោរកម្មថ្ងៃទី១៩ ខែតុលា ឆ្នាំ២០២៥ បានបង្ហាញពីចំណុចខ្វះខាត នៅក្នុងអាទិភាព ដែលត្រូវរាយការណ៍ជាយូរមកហើយ"។

គួររម្លឹកថា កាលពីខែតុលា ចោរមួយក្រុម បានធ្វើសកម្មភាពប្លន់ទាំងកណ្ដាលថ្ងៃ ដោយចំណាយពេលត្រឹមតែប៉ុន្មាននាទីប៉ុណ្ណោះ និងបានលួចគ្រឿងអលង្ការតម្លៃប្រមាណ ៨៨លានអឺរ៉ូ (ឬ ១០២ លានដុល្លារអាមេរិក)។ ក្រោយមក នាយកសារមន្ទីរបានទទួលស្គាល់ "ការបរាជ័យដ៏អាក្រក់" ផ្នែកសន្តិសុខ។ វត្ថុដែលត្រូវបានលួចនោះ មិនទាន់រកឃើញវិញនៅឡើយទេ ខណៈអ្នកជំនាញសម្ដែងក្ដីបារម្ភថា គ្រឿងអលង្ការទាំងនោះអាចនឹងបាត់ជារៀងរហូត៕