រដ្ឋាភិបាលរបស់ប្រទេសលីទុយអានី នៅថ្ងៃអង្គារ ទី៩ ខែធ្នូ នេះ បានប្រកាសដាក់រដ្ឋក្នុងភាពអាសន្ន ដោយសារតែការគំរាមកំហែងដល់សុវត្ថិភាពសាធារណៈ ពីបាឡុងរបស់អ្នករត់ពន្ធទំនិញខុសច្បាប់ ដែលមានប្រភពមកពីប្រទេសបេឡារុស។

គួរឱ្យដឹងថា លីទុយអានី បានចោទបេឡារុសថា អនុញ្ញាតឱ្យឈ្មួញរត់ពន្ធ ប្រើប្រាស់បាឡុងអាកាសធាតុ ដើម្បីដឹកជញ្ជូនបារីខុសច្បាប់ឆ្លងកាត់ព្រំដែន ដោយបង្ខំឱ្យអាកាសយានដ្ឋាន វីលនីញូស បញ្ឈប់ប្រតិបត្តិការម្តងហើយម្តងទៀត ធ្វើឱ្យរំខានដល់ចរាចរណ៍ផ្លូវអាកាស។ 

រដ្ឋមន្ត្រីក្រសួងមហាផ្ទៃលីទុយអានី បាននិយាយថា សេចក្តីប្រកាសនេះ ផ្តល់សេរីភាពប្រតិបត្តិការដល់យោធា ដែលអនុញ្ញាតឱ្យធ្វើសកម្មភាពក្នុងការសម្របសម្រួល ជាមួយនគរបាលឬដោយឯករាជ្យ ប៉ុន្តែមិនបញ្ជាក់លម្អិតនោះទេ។ ជាមួយគ្នានេះ រយៈពេលនៃវិធានការប្រកាសអាសន្ន ក៏មិនទាន់ច្បាស់ដែរ។

បេឡារុស ដែលអនុញ្ញាតឱ្យរុស្ស៊ី ប្រើទឹកដីរបស់ខ្លួនបើកប្រតិបត្តិការយោធាពិសេសក្នុងឆ្នាំ២០២២ លើអ៊ុយក្រែន បានបដិសេធការទទួលខុសត្រូវចំពោះឧប្បត្តិហេតុបាឡុងនោះ ហើយក៏បានចោទទៅលីទុយអានីវិញថា ជាអ្នកបង្កហេតុ។ លីទុយអានី ដែលជាសមាជិកណាតូ និងជាប្រទេសសហភាពអឺរ៉ុប ហើយក៏ធ្លាប់ជាផ្នែកមួយនៃសហភាពសូវៀតផងដែរនោះ បានច្រានចោលការចោទប្រកាន់របស់បេឡារុស ថាជារឿងមិនពិតនោះទេ៕