ឧត្តមសេនីយជាន់ខ្ពស់មួយរូបរបស់រុស្ស៊ីលោក Valery Gerasimov និយាយនៅថ្ងៃអង្គារនេះថា កងកម្លាំងទីក្រុងមូស្គូ កំពុងរុលចូលនៅតាមតំបន់ជួរមុខទាំងមូលរបស់អ៊ុយក្រែន ហើយនិងមានគោលដៅឡោមព័ទ្ធទាហានអ៊ុយក្រែននៅទីក្រុង Myrnohrad ។

នៅក្នុងជំនួបប៉ុស្តិ៍បញ្ជាការជាមួយក្រុមមន្រ្តីយោធាដែលកំពុងប្រយុទ្ធនៅតំបន់ Dnipropetrovsk របស់អ៊ុយក្រែន លោក Gerasimov និយាយថា លោកប្រធានាធិបតី Vladimir Putin បានបញ្ជាឲ្យយកឈ្នះកងកម្លាំងអ៊ុយក្រែននៅទីក្រុង Myrnohrad គឺជាទីក្រុងមួយដែលមានពលរដ្ឋមុនសង្រ្គាមចំនួន ៤៦.០០០នាក់ ស្ថិតនៅភាគខាងកើតទីក្រុង Pokrovsk នៃតំបន់ Donetsk របស់អ៊ុយក្រែន ។

លោក Gerasimov និយាយថា កងកម្លាំងរុស្ស៊ី ដណ្តើមបានការគ្រប់គ្រអគារនៅក្នុងទីក្រុង Myrnohrad ប្រហែល ៣០ភាគរយ ។

រុស្ស៊ីដែលប្រើឈ្មោះក្នុងយុគសម័យសូវៀត Krasnoarmeysk ដោយសំដៅលើទីក្រុងជិតខាង Pokrovskនោះ និយាយថា ពួកគេដណ្តើមបានការគ្រប់គ្រងទាំងស្រុងរួចទៅហើយទីក្រុងមួយនេះ ហើយពួកគេអះអាងថា ពួកគេកំពុងឡោមព័ទ្ធកងកម្លាំងអ៊ុយក្រែននៅទីក្រុង Myrnohrad ដែលរុស្ស៊ីហៅឈ្មោះថា Dimitrov ។

អ៊ុយក្រែន បានច្រានចោលម្តងហើយម្តងទៀតចំពោះអំណះអំណាងរបស់រុស្ស៊ីថា ទីក្រុង Pokrovsk បានធ្លាក់ក្នុងកណ្តាប់ដៃរបស់ទីក្រុងមូស្គូ ហើយពួកគេនិយាយថា កម្លាំងរបស់ខ្លួន នៅតែគ្រប់គ្រងផ្នែកខ្លះនៅក្នុងទីក្រុងមួយនេះ ហើយនិងកំពុងប្រយុទ្ធតបតនៅទីក្រុង Myrnohrad ។

គួររំឭកថា លោក Putinនិយាយកាលពីសប្តាហ៍មុនថា រុស្ស៊ី នឹងដណ្តើមគ្រប់គ្រងទាំងស្រុងតំបន់ Donbas របស់អ៊ុយក្រែន ដោយប្រើប្រាស់កងកម្លាំង លុះត្រាតែទាហានអ៊ុយក្រែនដកទ័ពចេញ គឺជាអ្វីមួយដែលទីក្រុងគីវ ធ្វើការច្រានចោលទាំងស្រុង ៕