សិស្សសាលា១០០នាក់ត្រូវបានដោះលែងកាលពីថ្ងៃចន្ទនៅក្នុងរដ្ឋនីហ្ស៊េ ប្រទេសនីហ្សេរីយ៉ា បន្ទាប់ពីពួកគេត្រូវបានចាប់ពង្រត់កាលពីខែមុនពីសាលារៀនកាតូលិកមួយកន្លែង។ វាគឺជាការចាប់ពង្រត់ទ្រង់ទ្រាយ ធំបំផុតមួយរបស់ប្រទេសក្នុងរយៈពេលប៉ុន្មានឆ្នាំថ្មីៗនេះ។ កុមារដែលត្រូវបានដោះលែងបានទៅដល់វិមានរដ្ឋាភិបាលក្នុងរដ្ឋធានី Minna រដ្ឋនីហ្ស៊េ ហើយត្រូវបានប្រគល់ឲ្យអភិបាលរដ្ឋ។

កុមារម្នាក់ បាននិយាយថា កុមារទាំងអស់បានដេកនៅក្នុងព្រៃ។ «ពួកគេបានឱ្យក្រណាត់តង់មកយើង យើងបានក្រាលវាដើម្បីអាចដេកបាន ប៉ុន្តែយើងមិនអាចធ្វើឲ្យមានសំឡេងរំខានដល់ពួកគេឡើយ»។ សមាគមគ្រិស្តសាសនាប្រទេសនីហ្សេរីយ៉ា បាននិយាយថា ខ្មាន់កាំភ្លើងបានចាប់សិស្សជាង ៣០០នាក់ និងបុគ្គលិក១២នាក់ មកពីសាលារៀនកាតូលិកនៅក្នុងភូមិ Papiri កាលពីថ្ងៃទី២១ ខែវិច្ឆិកា។

កុមារចំនួន៥០នាក់បានរត់គេចខ្លួន។ លោក Mohammed Umar-Bago អភិបាលរដ្ឋនីហ្ស៊េ បានិយាយថា «ខ្ញុំធានាដល់ឪពុកម្តាយ និងអាណាព្យាបាលរបស់កុមារទាំងនេះថា កុមារទាំងអស់នឹងត្រូវបានបញ្ជូនទៅឲ្យពួកគេវិញដោយសុវត្ថិភាពក្នុងពេលឆាប់ៗនេះ។ យើងបានអំពាវនាវដល់បុគ្គលិកសុខាភិបាលឱ្យមកពិនិត្យពួកគេ ពួកគេនឹងត្រូវបានពិនិត្យត្រឹមត្រូវមុនពេលនាំត្រឡប់ទៅឲ្យឪពុកម្តាយវិញ»។

ការចាប់ពង្រត់នេះបានបង្កឱ្យមានកំហឹងចំពោះភាពអសន្តិសុខកាន់តែអាក្រក់នៅភាគខាងជើងប្រទេសនីហ្សេរីយ៉ា ជាកន្លែងដែលក្រុមជនអន្ធពាលប្រដាប់អាវុធតែងតែកំណត់គោលដៅនៅសាលារៀនដើម្បីទាមទារប្រាក់លោះ។ ការចាប់ពង្រត់នៅសាលារៀននេះ បានកើនឡើងបន្ទាប់ពីក្រុមសកម្មប្រយុទ្ធ Boko Haram បានចាប់ពង្រត់ក្មេងស្រីចំនួន២៧៦នាក់ពីតំបន់ Chibok កាលពីឆ្នាំ២០១៤។