ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយកាលពីថ្ងៃចន្ទថា គោលបំណងចុងក្រោយរបស់ខ្លួននៅឆ្នាំ ២០២៦ គឺរៃអង្គាសមូលនិធិសរុបចំនួន៣៣ពាន់លានដុល្លារអាមេរិក ដើម្បីជួយដល់មនុស្ស១៣៥ លាននាក់ នៅទូទាំងប្រតិបត្តិការក្នុង២៣ប្រទេស និងផែនការចំនួន ៦ សម្រាប់ជនភៀសខ្លួន និងជនអន្តោប្រវេសន៍។ អង្គការ OCHA បាននិយាយថា អាទិភាពបន្ទាន់របស់ខ្លួនសម្រាប់ឆ្នាំក្រោយ គឺត្រូវជួយសង្គ្រោះជីវិតមនុស្ស៨៧លាននាក់ ដោយថវិកាចំនួន២៣ពាន់លានដុល្លារអាមេរិក។ 

អង្គការសហប្រជាជាតិនិងដៃគូរបស់ខ្លួន បានចាប់ផ្តើមអំពាវនាវមនុស្សធម៌សកលឆ្នាំ ២០២៦ ដើម្បីជួយសង្គ្រោះជីវិតមនុស្សរាប់លាននាក់ នៅកន្លែងដែលមានការប៉ះទង្គិចគ្នាខ្លាំងបំផុត ក្នុងសង្គ្រាម គ្រោះមហន្តរាយអាកាសធាតុ រញ្ជួយដី ជំងឺរាតត្បាត និងកន្លែងណាដែលដំណាំខូចខាតកើតឡើង។ 

លោក Tom Fletcher អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជាអ្នកសម្របសម្រួលជំនួយសង្គ្រោះ កាលពីថ្ងៃចន្ទបានធ្វើបទបង្ហាញដល់ប្រព័ន្ធផ្សព្វផ្សាយអំពីទិដ្ឋភាពទូទៅមនុស្សធម៌សកលឆ្នាំ២០២៦ ដែលទើបចេញផ្សាយថ្មី ជាការវាយតម្លៃប្រចាំឆ្នាំអំពីតម្រូវការមនុស្សធម៌សកល និងរបៀបឆ្លើយតបទៅនឹងតម្រូវការ ព្រមទាំងផ្តល់ការវិភាគអំពីកត្តាជំរុញនៃតម្រូវការ និងទិដ្ឋភាពទូទៅនៃធនធានដែលត្រូវការដើម្បីជួយដល់ប្រជាជនដែលត្រូវបានកំណត់គោលដៅសម្រាប់ជំនួយ។ លោកនិយាយថា «អាទិភាពរបស់យើងសម្រាប់ឆ្នាំ ២០២៦ គឺជួយសង្គ្រោះជីវិតមនុស្ស ៨៧ លាននាក់។