បាត់ដំបង៖ស.ស.យ.ក.ខេត្តបាត់ដំបង សហការជាមួយរដ្ឋបាលខេត្តបាត់ដំបង មន្ទីរសុខាភិបាលខេត្ត និងមជ្ឈមណ្ឌលផ្តល់ឈាមខេត្តបាត់ដំបង នឹងរៀបចំព្រឹត្តិការណ៍នៃការបរិច្ចាគឈាមស្ម័គ្រចិត្ត ក្រោមប្រធានបទ៖ “អ្នកជួរក្រោយ រួមគ្នាសង្គ្រោះអ្នកជួរមុខ ក្នុងគោលបំណងដើម្បីជាកម្លាំងចិត្តជួយដល់វីរៈកងទ័ពជួរមុខ និងប្រជាជននៅតាមព្រំដែន ក៏ដូចជាការរួមចំណែកក្នុងការថែរក្សាការពារបូរណភាពទឹកដីកម្ពុជាយើងប្រយុទ្ធ នឹងសត្រូវឈ្លានពាន។

តាមរយៈសេចក្តីជូនដំណឹងនៅថ្ងៃទី៩ ខែធ្នូ ឆ្នាំ២០២៥នេះ សហភាពសហព័ន្ធយុវជនកម្ពុជាខេត្តបាត់ដំបង បានអំពាវនាវដល់សមាជិក សមាជិកា ស.ស.យ.ក.ខេត្ត គ្រឹះស្ថានសិក្សា មន្ទីរវិស័យ និង សាធារណជនទាំងអស់នៅក្នុងខេត្តបាត់ដំបងអាចរួមចំណែកតាមរយៈការបរិច្ចាគឈាមដោយស្ម័គ្រចិត្តចាប់ពីថ្ងៃទី១០ ខែធ្នូ ឆ្នាំ២០២៥ វេលាម៉ោង៩៖០០នាទីព្រឹក រហូតដល់ម៉ោង ១៦៖០០នាទីរសៀល តទៅ នៅស្នាក់ការ ស.ស.យ.ក.ខេត្តបាត់ដំបង ស្ថិតនៅផ្លូវពោធិ៍វង្ស ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

ស.ស.យ.ក.ខេត្តបាត់ដំបង សង្ឃឹមយ៉ាងមុតមាំថា ឯកឧត្តម លោកជំទាវ លោក លោកស្រី សមាជិក សមាជិកា ស.ស.យ.ក.ខេត្ត គ្រឹះស្ថានសិក្សា មន្ទីរវិស័យ និងសាធារណជនទាំងអស់ នឹងអញ្ជើញមកបរិច្ចាគ ឈាមតាមការស្ម័គ្រចិត្តឱ្យបានច្រើនកុះករ ដើម្បីបង្ហាញពីការពួតដៃគ្នាក្នុងស្មារតីស្នេហាជាតិ សាមគ្គីឯកភាពជាតិ ជាធ្លុងតែមួយខ្មែរតែមួយ៕