លោក វ្ល៉ូឌីមី ហ្សេឡិនស្គី បាននិយាយថា អ៊ុយក្រែនត្រូវការថវិកាចំនួន ១៥ ពាន់លានដុល្លារ ក្រោមកម្មវិធី PURL (បញ្ជីតម្រូវការអាទិភាពរបស់អ៊ុយក្រែន) ដើម្បីទិញអាវុធ ក្នុងឆ្នាំ ២០២៦ 

ប្រព័ន្ធផ្សព្វផ្សាយ Novosti. Live បានដកស្រង់សម្តីលោកដែលបាននិយាយនៅលើបណ្តាញTelegram របស់ខ្លួនថា៖«កម្មវិធី PURL ត្រូវការថវិកាចំនួន ១៥ ពាន់លានដុល្លារ។ ចំពោះឆ្នាំនេះ យើងខ្វះខាតថវិកាចំនួន ១,៥ ពាន់លានដុល្លារ ប៉ុន្តែប្រទេសហូឡង់បានផ្តល់ថវិកាចំនួន ៧០០ លានដុល្លារ នៅចន្ទ។ បច្ចុប្បន្ន យើងខ្វះខាតថវិកាចំនួន ៨០០ លានដុល្លារ»។ 

កម្មវិធី PURL ត្រូវបានបង្កើតឡើងដោយប្រធានាធិបតីអាមេរិកលោក ដូណាល់ ត្រាំ និងអគ្គលេខាធិការ អង្គការណាតូ លោក Mark Rutte នៅថ្ងៃទី ១៤ ខែកក្កដា។ គំនិតផ្តួចផ្តើមនេះមើលឃើញថា សម្ព័ន្ធមិត្ត ណាតូទិញអាវុធសម្រាប់អ៊ុយក្រែនពីយោធារបស់សហរដ្ឋអាមេរិក។ ការផ្គត់ផ្គង់អាវុធក្រោមកម្មវិធីនេះ ត្រូវអនុវត្តរៀងរាល់ពីរឬបីសប្តាហ៍ម្តង៕