ការបំពុលខ្យល់បរិយាកាសដែលបន្តជាប់រហូតនៅក្នុងទីក្រុងហ្សាការតា បានបង្កឲ្យមានជំងឺផ្លូវដង្ហើមជិត ២លានករណី ពេញមួយឆ្នាំ២០២៥។ ហើយយោងតាមទិន្នន័យថ្មីរបស់អង្គការសហប្រជាជាតិ (UN) បានឲ្យដឹងថា កម្រិតនេះបានបង្កើនក្តីបារម្ភ ចំពោះសុខុមាលភាពរយៈពេលវែង សម្រាប់ប្រជាជនចំនួន ១១លាននាក់នៃរដ្ឋធានីរបស់ឥណ្ឌូនេស៊ី និង ៤២លាននាក់នៃតំបន់ជុំវិញទីក្រុងដែលមានប្រជាជនច្រើនជាងគេបំផុតរបស់ពិភពលោកមួយនេះ។

បើយោងតាមទីភ្នាក់ងារសុខភាពទីក្រុងហ្សាការតា បានឲ្យដឹងថា គិតត្រឹមខែតុលា មនុស្សជាង ១,៩លាននាក់ នៅក្នុងរដ្ឋធានី បានឆ្លងមេរោគផ្លូវដង្ហើមស្រួចស្រាល់ ដោយកុមារមានជិត ២០ភាគរយនៃចំនួននេះ។ កាលពីថ្ងៃចន្ទ (ទី៨ ខែធ្នូ) ប្រធានទីភ្នាក់ងារនេះ លោកស្រី Ani Ruspitawati បានប្រាប់សារព័ត៌មាន The Jakarta Post ថា៖ «ជាទូទៅ កត្តាជាច្រើនបណ្ដាលឲ្យមានការឆ្លងមេរោគផ្លូវដង្ហើមស្រួចស្រាល់ ដូចជាការផ្លាស់ប្តូរលក្ខខណ្ឌអាកាសធាតុ ការបំពុលខ្យល់ ដង់ស៊ីតេប្រជាជនខ្ពស់ និងការចល័តរបស់អ្នកក្រុងហ្សាការតា ការថយចុះភាពស៊ាំ និងការប៉ះពាល់នឹងភ្នាក់ងារបង្កជំងឺនេះ»។

របាយការណ៍ដែលចេញផ្សាយដោយក្រសួងសុខាភិបាល កាលពីថ្ងៃទី២៩ ខែវិច្ឆិកា បានដាក់ទីក្រុងហ្សាការតាជាខេត្ត ដែលមានអត្រាជំងឺផ្លូវដង្ហើមខ្ពស់ជាងគេបំផុតទី៣ នៅក្រោយតែកោះជ្វាខាងលិច (West Java) និងកោះជ្វាកណ្តាល (Central Java) ប៉ុណ្ណោះ។

ក្រសួងបានរាយការណ៍ថា មនុស្សជាង ១២លាននាក់នៅក្នុងប្រទេស បានទទួលរងបញ្ហាផ្លូវដង្ហើមនៅឆ្នាំ២០២៥ ដោយនិន្នាការនេះបានបន្តកើនឡើង ចាប់តាំងពីសប្តាហ៍ដំបូងនៃខែមករា។ អ្នកជំនាញ និងសកម្មជន បានស្តីបន្ទោសជាយូរមកហើយថា គុណភាពខ្យល់មិនល្អនៅក្នុងទីក្រុងហ្សាការតា ធ្វើឲ្យរដ្ឋធានីនេះកាន់តែងាយរងគ្រោះដោយសារគ្រោះថ្នាក់បរិស្ថាន៕