កំពង់ឆ្នាំង៖ រដ្ឋបាលខេត្តកំពង់ឆ្នាំង បានត្រៀមទីបច្ឆារួចជាស្រេចចំនួន ៤ទីតាំងនៅក្នុងខេត្ត សម្រាប់បូជាសពជនរងគ្រោះដែលបានស្លាប់ដោយជំងឺឆ្លងកូវីដ១៩។ ការរៀបចំនេះ បានធ្វើឡើងក្រោយពីទទួលបានការណែនាំពីសម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា ឲ្យរដ្ឋបាលរាជធានីខេត្តរកទីតាំងបច្ឆា សម្រាប់បូជាសពអ្នកស្លាប់ដោយសារកូវីដ-១៩។ នេះបើយោងតាមការបញ្ជាក់ពីលោក ស្រ៊ន សំឬទ្ធី អភិបាលរងខេត្ត និងជាអ្នកនាំពាក្យសាលាខេត្តកំពង់ឆ្នាំង នាល្ងាចថ្ងៃទី១៥ ខែមីនា ឆ្នាំ២០២១នេះ។
លោក ស្រ៊ន សំឬទ្ធី អ្នកនាំពាក្យរដ្ឋបាលខេត្តបានបន្តថា ក្រោយពីទទួលបានបទបញ្ជារបស់សម្ដេចតេជោ ហ៊ុន សែន និងការដឹកនាំបញ្ជាដោយផ្ទាល់ពីឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងភ្លាម អាជ្ញាធរ និងជំនាញពាក់ព័ន្ធ បានគិតគូរ ជ្រើសរើសទីតាំងសម្រាប់រៀបចំធ្វើជាកន្លែងបូជាសពអ្នកស្លាប់ដោយសារជំងឺកូវីដ១៩ ដោយគិតគូរពីសុវត្ថិភាព និងមិនឲ្យប៉ះពាល់ដល់សុខុមាលភាពប្រជាពលរដ្ឋ ទើបក្រុមការងារបានពិនិត្យ និងសម្រេចជ្រើសរើសយកទីតាំងចំនួន ៤ទីតាំង នៅក្នុងខេត្ត ក្នុងនោះ មានវត្តទួលខ្សាច់ ស្ថិតក្នុងស្រុករលាប្អៀរ វត្តត្រពាំងខ្ចៅ ស្ថិតក្នុងស្រុកកំពង់ត្រឡាច វត្តសុវណ្ណណេ ស្ថិតក្នុងស្រុកទឹកផុស និងវត្តសិរី ស្ថិតក្នុងស្រុកបរិបូណ៌។ ទីតាំងវត្តដែលមានបច្ឆាបូជាសពទាំង ៤ខាងលើនេះ ជាទីកន្លែងដែលក្រុមការងារបានពិនិត្យថា មិនមានការប៉ះពាល់ដល់សុខុមាលភាពប្រជាពលរដ្ឋ ដោយវត្តទាំងនោះមានទីធ្លាធំទូលាយ និងនៅឆ្ងាយពីផ្ទះប្រជាពលរដ្ឋ។
លោក ប្រាក់ វ៉ុន ប្រធានមន្ទីរសុខាភិបាលបានអោយដឹងថា ក្រុមការងារបច្ចេកទេសនៃមន្ទីរសុខាភិបាល នឹងចុះទៅបង្ហាត់បង្រៀនបច្ចេកទេសការពារដល់ព្រះសង្ឃ លោកអាចារ្យ ដូនជី នៅតាមវត្តទាំង៤ទីតាំង អោយពួកគាត់ចេះការពារខ្លួនពីការឆ្លងរាលដាលនៃវីរុសកូវីដ១៩ នៅពេលមានសពជនរងគ្រោះដែលស្លាប់ដោយសារជំងឺកូវីដ១៩នោះ។
ទោះបីមកដល់ពេលនេះ ការរីករាលដាលនៃជំងឺកូវីដ១៩ នៅតែបន្តមាន និងមានអ្នកស្លាប់ម្នាក់នៅភ្នំពេញក្ដី ក៏នៅក្នុងភូមិសាស្ត្រខេត្តកំពង់ឆ្នាំង មិនទាន់មានអ្នកឆ្លងជំងឺកូវីដ១៩នៅឡើយ។
ក៏ប៉ុន្តែ ចំពោះអ្នកធ្វើចត្តាឡីស័ករហូតមកដល់ថ្ងៃទី១ ខែមីនានេះមានចំនួន ១៧៨នាក់ ក្នុងនោះ មានពលករមកពីប្រទេសថៃ, អ្នកពាក់ព័ន្ធប្រយោលនឹងព្រឹត្តិការណ៍ ២០កុម្ភៈ និងអ្នកធ្វើដំណើរមកពីក្រុងព្រះស៊ីហនុ។ ដោយឡែកមណ្ឌលចត្តាឡីស័កក្នុងខេត្តកំពង់ឆ្នាំងមាន៤ទីតាំង គឺនៅក្នុងស្រុកបរិបូណ៌ ស្រុកកំពង់ត្រឡាច ស្រុករលាប្អៀរ និងស្រុកទឹកផុស៕ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
