ចិន៖ ក្រសួងការបរទេសចិនបាននិយាយកាលពីថ្ងៃពុធថា កោះតៃវ៉ាន់មិនមែនជាប្រទេសអ៊ុយក្រែនទេ ហើយក៏តែងតែមិនអាចកាត់ផ្ដាច់ចេញពីផ្នែកមួយរបស់ចិនបានឡើយ ខណៈមេដឹកនាំកោះនេះគឺលោកស្រី Tsai Ing-wen បានអំពាវនាវឲ្យកោះនេះបង្កើនការប្រុងប្រយ័ត្នលើសកម្មភាពយោធា ឆ្លើយតបទៅនឹងវិបត្តិនេះ។
ការអត្ថាធិប្បាយនេះមានឡើងបន្ទាប់ពីនាយករដ្ឋមន្ត្រីអង់គ្លេស Boris Johnson បានលើកឡើងពីហានិភ័យសម្រាប់កោះតៃវ៉ាន់ ក្នុងការព្រមានមួយកាលពីសប្ដាហ៍មុនអំពីការខូចខាតធ្ងន់ធ្ងរទូទាំងពិភពលោក ប្រសិនបើប្រទេសលោកខាងលិចបរាជ័យក្នុងការបំពេញតាមការសន្យារបស់ពួកគេ គាំទ្រឯករាជ្យភាពរបស់អ៊ុយក្រែន។ ប្រទេសចិនដែលអះអាងកោះតៃវ៉ាន់ជាដែនដីរបស់ខ្លួន បានបង្កើនសកម្មភាពយោធាជិតកោះស្វ័យគ្រប់គ្រងជាង ២ឆ្នាំកន្លងមកនេះ ទោះបីជាកោះតៃវ៉ាន់ពុំបានរាយការណ៍ពីសកម្មភាពថ្មីៗខុសប្រក្រតី បង្កឡើងដោយកងកម្លាំងរបស់ប្រទេសចិន ខណៈភាពតានតឹងជុំវិញវិបត្តិអ៊ុយក្រែនឡើងកម្ដៅខ្លាំងក៏ដោយ។ ថ្លែងនៅក្នុងទីក្រុងប៉េកាំង អ្នកនាំពាក្យក្រសួងការបរទេសចិនលោកស្រី Hua Chunying បានច្រានចោលការជាប់ទាក់ទងទាំងឡាយរវាងប្រទេសអ៊ុយក្រែន និងកោះតៃវ៉ាន់។ លោកស្រីថា កោះតៃវ៉ាន់មិនមែនជាប្រទេសអ៊ុយក្រែនឡើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
