លោក Filippo Grandi គឺជាឧត្តមស្នងការជនភៀសខ្លួនរបស់អង្គការសហប្រជាជាតិ(UN) និយាយប្រាប់ទីភ្នាក់ងារព័ត៌មានរ៉យទ័រថា ការរុលចូលរបស់កងកម្លាំងគាំទ្ររហ័ស(RSF) អាចនឹងមានការធ្វើចំណាកស្រុកមួយទៀតឆ្លងកាត់ព្រំដែនស៊ូដង់ ។

កងកម្លាំង RSF ដណ្តើមកាន់កាប់ទីក្រុង el-Fasher ដែលជារដ្ឋធានីនៃរដ្ឋ North Darfur កាលពីខែតុលាកន្លងទៅ ក្រោយយុទ្ធនាការឡោមព័ទ្ធ និងការបង្អត់អាហាររយៈពេល ១៨ខែ ។ ទីក្រុងមួយនេះ គឺជាតំបន់កាន់កាប់ចុងក្រោយគេរបស់កងទ័ពស៊ូដង់នៅតំបន់នោះ ។

លោក Grandi និយាយថា បច្ចុប្បន្នភាគច្រើននៃពលរដ្ឋ ៤ម៉ឺននាក់ដែល UNនិយាយថា ត្រូវបានជម្លៀសខ្លួន អំឡុងអំពើហិង្សាចុងក្រោយនៅស្រុក Kordofan បានស្វែងកន្លែងជ្រកកោននៅក្នុងស្រុកផ្ទាល់ខ្លួនរបស់ពួកគេ ហើយការជ្រកកោនបែបនេះ អាចនឹងផ្លាស់ប្តូរ បើសិនជាអំពើហិង្សារាលដាលដល់ទីក្រុងធំដូចជាទីក្រុង El Obeid ហើយវានឹងធ្វើឲ្យវិបត្តិជនភៀសខ្លួនកាន់តែលិចលង់ជ្រៅឡើង ។

អំឡុងបទសម្ភាសន៍ពីកំពង់ផែស៊ូដង់ លោក Grandi បញ្ជាក់ថា បើសិនជាសង្រ្គាមនៅតែបន្ត លោកប្រាកដខ្លាំងណាស់ថា ពួកយើងនឹងមើលឃើញការធ្វើចំណាកស្រុកបន្ថែមទៀត ។

ប្រទេសស៊ូដង់ បានជាប់ផុងក្នុងសង្រ្គាមស៊ីវិល ចាប់តាំងពីខែមេសា ឆ្នាំ ២០២៣រហូតមក ពេលដែលការប្រយុទ្ធគ្នា បានផ្ទុះឡើងរវាងកងទ័ពស៊ូដង់ និងទាហានប៉ារ៉ា RSF ។

យោងតាមការអះអាងរបស់ UNបានឲ្យដឹងថា ជម្លោះមួយនេះ បានសម្លាប់មនុស្សរាប់ម៉ឺននាក់ និងមនុស្សជាង ១២លាននាក់ផ្សេងទៀត រត់ភៀសខ្លួន ហើយនិងធ្វើឲ្យមនុស្សប្រហែល ៣០លាននាក់ ត្រូវការជំនួយមនុស្សធម៌ ៕