​ប្រណាំង​រថយន្ត៖ កីឡាករ​ប្រណាំង​រថយន្ត F1 ម៉ូ​ណា​កូរ​បស់ Ferrari, Charles Leclerc គឺជា​អ្នក​បើក​បរ​បាន​លឿន​ជាងគេ​ក្នុង​ការ​សាក​ល្បង​រថយន្ត​ត្រៀម​រដូវ​កាល​ថ្មី ២០២២ នេះ​។ ​Charles Leclerc បាន​ប្រើ​ថេរវេលា​ក្នុង​មួយ​ជុំ ១នាទី ២០វិនាទី ១៦៥ នៅ​លើ​ទីលាន Catalunya ក្រុង Barcelona ប្រទេស​អេ​ស្ប៉ា​ញ​។

​​តាម​ពីក្រោយ Leclerc គឺ​កីឡាករ​អង់គ្លេស Lando Norris របស់​ក្រុម McLaren​។​ ​ចំណែក​ជើងឯក​ពិភព​លោក Max Verstappen របស់​ក្រុម Red Bull ជា​អ្នកបើកបរ​នៅលើ​ទីលាន​នេះ​បាន​ច្រើន​ជុំជាង​គេ តែ​បាន​កំណត់ត្រា​វេលា​ល្អ​បំផុត​ត្រឹម​ចំណាត់ថ្នាក់​លេខ ៦ ប៉ុណ្ណោះ​។ ​George Russell ដែលជា​មិត្ត​រួម​ក្រុម​ថ្មី​របស់ Lewis Hamilton នៅ Mercedes នោះ​ធ្វើបាន​ចំណាត់ថ្នាក់​ទី៣ នៅ​ពីមុខ​ជើងឯក​ពិភព​លោក ៤សម័យ Sebastian Vettel របស់​ក្រុម Aston Martin​។​ ​រីឯ​កីឡាករ​វ័យ ៤០​ឆ្នាំ Fernando Alonso ដែលជា​កីឡាករ​វ័យ​ចំណាស់​បំផុត​នៅ​លើ​ទីលាន​បាន​ត្រឹម​ចំណាត់ថ្នាក់​លេខ៧ ជាមួយ​ក្រុម Alpine​។ ​F1 រដូវ​កាល ២០២២ នេះ​នឹង​ចាប់ផ្តើម​ចេញដំណើរ​ពី​ទីលាន​ដំបូង​នៅ​ប្រទេស​បា​រ៉ែ​ន​ខែក្រោយ​នេះហើយ​៕

​អត្ថបទ​៖​នាង សុភា​វុ​ធ