សមាជិកសភាជាន់ខ្ពស់អាល្លឺម៉ង់ នៅថ្ងៃអង្គារ (ទី៨ ខែធ្នូ) នេះ បានជំរុញឲ្យអាល្លឺម៉ង់ និងបារាំងជួយសង្គ្រោះគម្រោងការពារជាតិតម្លៃ ១០០ពាន់លានអឺរ៉ូ (១១៦ពាន់លានដុល្លារ) ដោយបង្កើតប្រព័ន្ធប្រយុទ្ធរួមគ្នា ខណៈដែលអនុញ្ញាតឲ្យប្រទេសនីមួយៗប្រើប្រាស់យន្តហោះចម្បាំងផ្ទាល់ខ្លួន។

ពេលវេលាកំពុងធ្វើដំណើរទៅមុខជាប់ជានិច្ច ទាំងសម្រាប់ទីក្រុងប៊ែរឡាំង និងប៉ារីស សម្រាប់ការយល់ព្រមលើផ្លូវឆ្ពោះទៅកាន់ការបង្កើតប្រព័ន្ធ Future Combat Air System (FCAS) ជាកម្មវិធីយន្តហោះចម្បាំងជំនាន់ក្រោយដ៏ធំមួយដែលបានបើកដំណើរការកាលពី ៨ឆ្នាំមុន ប៉ុន្តែត្រូវបានគាំងដោយសារជម្លោះ។

ការណ៍ដែលមិនអាចបំបែកភាពជាប់គាំងនេះបាន ធ្វើឲ្យមានហានិភ័យ ដែលបង្ហាញឲ្យឃើញនូវភាពអសមត្ថភាពរបស់អឺរ៉ុប ក្នុងការបង្កើតការឯកភាពការពារជាតិ នៅពេលសង្គ្រាមបានវិលត្រឡប់មកកាន់ទ្វីបនេះវិញ ហើយសហរដ្ឋអាមេរិកក្រោមការដឹកនាំរបស់លោកប្រធានាធិបតី Donald Trump ចង់ឲ្យអឺរ៉ុបទទួលខុសត្រូវបន្ថែមទៀត ចំពោះសន្តិសុខរបស់ខ្លួន។

រដ្ឋមន្ត្រីការពារជាតិនៃប្រទេសអាឡឺម៉ង់ បារាំង និងអេស្ប៉ាញ ត្រូវបានគេរំពឹងថា នឹងជួបប្រជុំគ្នានៅសប្តាហ៍នេះ ដែលតាមមកដោយកិច្ចពិភាក្សា រវាងអធិការបតីអាល្លឺម៉ង់ លោក Friedrich Merz និងប្រធានាធិបតីបារាំង លោក Emmanuel Macron នាសប្តាហ៍ក្រោយ។

លោកស្រី Siemtje Moeller សមាជិកសភាជាន់ខ្ពស់នៅក្នុងរដ្ឋាភិបាលចម្រុះរបស់លោក Merz បានប្រាប់សារព័ត៌មាន Reuters ថា គម្រោងនេះគឺស្ថិតក្នុងដំណាក់កាល «កែតម្រូវ» មិនមែនដំណាក់ «បញ្ចប់» នោះទេ។ យ៉ាងណាក្ដី លោកស្រីបានបន្ថែមថា វាគឺសមហេតុផល ទាំងសម្រាប់អាល្លឺម៉ង់ និងបារាំង ក្នុងការប្រើប្រាស់យន្តហោះចម្បាំងផ្សេងៗគ្នា ដើម្បីបំពេញតម្រូវការជាក់លាក់របស់ប្រទេសរៀងៗខ្លួន ឧទាហរណ៍ បារាំងត្រូវការយន្តហោះចម្បាំង ដើម្បីមានសមត្ថភាពអាចបំពាក់អាវុធនុយក្លេអ៊ែរ ឬចុះចតនៅលើនាវាផ្ទុកយន្តហោះ៕