តុលាការព្រហ្មទណ្ឌអន្តរជាតិ (ICC) នៅថ្ងៃអង្គារ (ទី៩ ខែធ្នូ) នេះ បានកាត់ទោសអតីតមេដឹកនាំកងជីវពលស៊ូដង់ លោក Ali Muhammad Ali Abd al-Rahman ដែលគេត្រឹមឈ្មោះថា Ali Kushayb ជាប់ពន្ធនាគាររយៈពេល ២០ឆ្នាំ ពីបទឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម ដែលបានប្រព្រឹត្តនៅតំបន់ Darfur ក្នុងឆ្នាំ ២០០៣-២០០៤។

តុលាការ ICC បានប្រកាសជាឯកច្ឆន្ទដាក់ពន្ធនាគាររួម ២០ឆ្នាំ ចំពោះលោក Abd al-Rahman បន្ទាប់ពីរូបលោកត្រូវបានរកឃើញថា មានទោសកាលពីថ្ងៃទី៦ ខែតុលា ក្នុងចំណោមបទចោទ ២៧ករណី ពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាមដែលបានប្រព្រឹត្តនៅតំបន់ Darfur ប្រទេសស៊ូដង់ ចន្លោះខែសីហា ឆ្នាំ២០០៣ និងខែមេសា ឆ្នាំ២០០៤។

តុលាការបានកត់សម្គាល់ថា អង្គជំនុំជម្រះនឹងផ្ដល់រយៈពេលជាប់ទោសយូរជាងនេះ ប្រសិនបើវាមិនមានកត្តាឲ្យកាត់បន្ថយទោស ដូចជាអាយុរបស់អ្នកទោស ការប្រព្រឹត្តល្អ ពេលជាប់ឃុំខ្លួន និងអំឡុងពេលសវនាការ និងការព្រមប្រគល់ខ្លួនដល់តុលាការដោយស្ម័គ្រចិត្តរបស់លោក ខណៈដែលសង្កត់ធ្ងន់ថា តុលាការផ្តល់កត្តាទាំងនេះ «មានឥទ្ធិពលតិចតួចប៉ុណ្ណើ» ក្នុងការកំណត់ការកាត់ទោសសមស្រប។

តុលាការ បានកត់សម្គាល់បន្ថែមទៀតថា ពេលវេលាដែលលោក Abd al-Rahman បានចំណាយនៅក្នុងការជាប់ឃុំឃាំង ចាប់ពីថ្ងៃព្រមប្រគល់ខ្លួននៅថ្ងៃទី៩ ខែមិថុនា ឆ្នាំ២០២០ រហូតដល់ថ្ងៃចេញសាលក្រមនេះ នឹងត្រូវដកចេញពីការកាត់ទោសរបស់លោក។ នៅខែតុលា ឆ្នាំ២០២៥ ICC បានរកឃើញថា រូបលោកមានទោស ២៧ករណី ពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាម ដែលបានប្រព្រឹត្តនៅតំបន់ Darfur ក្នុងឆ្នាំ ២០០៣-២០០៤៕