ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៅរសៀលថ្ងៃទី២៤កុម្ភៈនេះ បានអញ្ជើញដឹកនាំប្រតិភូរាជរដ្ឋាភិបាលមួយចំនួន ទៅគោរពវិញ្ញាណក្ខន្ធសពរបស់ នាយឧត្តមសេនីយ៍ សុខ សារឿន រដ្ឋលេខាធិការក្រសួងការពារជាតិ ដែលទទួលមរណភាព កាលពីថ្ងៃទី២៣កុម្ភៈម្សិលមិញនេះ ដោយរោគាពាធ។

គួរបញ្ជាក់ដែរថា ភ្លាមៗនោះ សម្តេចតេជោ នាយករដ្ឋមន្ត្រី ក៏បានផ្ញើលិខិត​សំដែង​នូវការ​ក្ដុកក្ដួល​និង​សោកស្តាយ​ជាមួយក្រុមគ្រួសារ នៃសពគឺលោកជំទាវ សុខ លាង ។

លិខិតមានខ្លឹមសារយ៉ាងដូច្នេះ៖ លោកជំទាវជាទីរាប់អាន! ភរិយាខ្ញុំ និងរូបខ្ញុំបាន​ទទួល​ដំណឹង​ដ៏​ក្រៀមក្រំ និងសោកស្ដាយរកអ្វីមកប្រៀបផ្ទឹមពុំបាន ដោយទទួលដំណឹងថា ឯកឧត្តម​នាយឧត្តមសេនីយ៍ សុខ សារឿន រដ្ឋលេខាធិការក្រសួងការពាជាតិ ដែលត្រូវជា ស្វាមី​លោកជំទាវ​បា​នទទួលមរណភាព នាវេលាម៉ោង ១០:៤៥ នាទីព្រឹក នៅថ្ងៃពុធ ៧រោច ខែមាឃ ឆ្នាំឆ្លូវ ត្រីស័ក ពស ២៥៦៥ ត្រូវ នឹងថ្ងៃទី២៣ ខែ កុម្ភៈ ឆ្នាំ២០២២ ក្នុងជន្មាយុ ៧៩ ឆ្នាំ ដោយរោគាពាធ ។

មរណភាពរបស់ឯកឧត្តម គឺជាការបាត់បងស្វាមី បិតា ជីតាដែលប្រកបដោយព្រហ្មវិហារធម៌ និង​ជាការបាត់បង់នូវមិត្តរួមអាវុធតស៊ូរំដោះជាតិចេញពីរបបប្រល័យពូជសាសន៍ ប៉ុល ពត និង​បាន​រួមសុខ​រួមទុក្ខជាមួយគ្នាក្នុងការបំរើជាតិ ​និងប្រជាជនកម្ពុជា​រហូតដល់ថ្ងៃអវសាននៃជីវិត ។

ក្នុងឱកាសប្រកប​ដោយ​សមាន​ទុក្ខដ៏ក្រៀមក្រំបំផុតនេះ ​ភរិយា ​និងរូបខ្ញុំ ​សូម​ចូលរួម​ចែក​រំលែក នូវ​មរណទុក្ខ​ដោយក្តីស្រណោះ​ និង​ការ​អាឡោះ​អាល័យ​ជាមួយលោកជំទាវ ​និងបុត្រាបុត្រី ព្រមទាំង​បងប្អូន ​កូនក្មួយ​ទាំងអស់នៃសព ​ដោយ​សេចក្តីសង្វេគជាទីបំផុត ។

ភរិយា និងរូបខ្ញុំ សូម​ឧទ្ទិស​បួងសួង​ដល់​ដួង​វិញ្ញាណក្ខន្ធ​ឯកឧត្តមនាយឧត្តមសេនីយ៍​ សុខ សារឿន បានឆាប់ចាប់កំណើតក្នុងសុគតិភពគ្រប់ៗជាតិកុំបីឃ្លៀងឃ្លាតឡើយ ។ សូមលោកជំទាវទទួល​នូវការរំលែកទុក្ខដ៏ក្រៀម​ក្រំ​បំផុត​ពីភរិយាខ្ញុំ ​និងរូបខ្ញុំ ។

គួរ​រម្លឹក​ផងដែរថា​ ឯកឧត្តម សុខ សារឿន​ អតីត​គឺ​ជា​មេ​របស់​សម្តេចតេជោ​ នៅ​ក្នុង​សម័យតស៊ូ៕

អត្ថបទ៖ មុត សុទ្ធ