ប្រធានកិច្ចប្រជុំកំពូលប្លុកអឺរ៉ុប លោក Antonio Costa បាននិយាយកាលពីថ្ងៃអង្គារ (៩ ធ្នូ) ថា សហភាពអឺរ៉ុប (EU) កំពុងតែខិតទៅជិតដំណោះស្រាយមួយហើយ ក្នុងការផ្តល់ហិរញ្ញប្បទានដល់អ៊ុយក្រែន នៅឆ្នាំ២០២៦ និង២០២៧ រួមជាមួយនឹងការគាំទ្រពីបណ្ដាប្រទេស EU យ៉ាងតិចមួយភាគធំ ដែលមានលក្ខណៈសម្បត្តិគ្រប់គ្រាន់ ជុំវិញការប្រើទ្រព្យសម្បត្តិរបស់រុស្ស៊ី ដែលត្រូវបង្កកនៅលោកខាងលិច។

គួរឱ្យដឹងថា កាលពីថ្ងៃទី២៣ ខែតុលា ថ្នាក់ដឹកនាំសហភាពអឺរ៉ុប បានសន្យាថានឹងផ្តល់ហិរញ្ញប្បទានឱ្យទីក្រុងគីវ សម្រាប់រយៈពេល ២ឆ្នាំខាងមុខ ខណៈអ៊ុយក្រែនបន្តប្រយុទ្ធប្រឆាំងនឹងប្រតិបត្តិការយោធារបស់រុស្ស៊ី ហើយនៅពេលដែលការរួមចំណែកផ្នែកហិរញ្ញវត្ថុរបស់សហរដ្ឋអាមេរិក កំពុងរីងស្ងួត។

មេដឹកនាំទាំងនោះ ត្រូវតែសម្រេចចិត្តនៅក្នុងកិច្ចប្រជុំកំពូលមួយនៅថ្ងៃទី១៨ ខែធ្នូ សប្ដាហ៍ក្រោយនេះ នៅទីក្រុងប្រ៊ុចសែល អំពីមធ្យោបាយបំពេញការសន្យារបស់ពួកគេ ហើយលោក Costa បានប្រាប់អ្នកយកព័ត៌មាននៅទីក្រុងឌុយប្លាំងថា លោកនឹងបន្តជជែកពិភាក្សាជាច្រើនថ្ងៃ ប្រសិនបើចាំបាច់ រហូតដល់សម្រេចកិច្ចព្រមព្រៀងផ្លូវការមួយ។

ដោយសាររដ្ឋាភិបាលប្លុកអឺរ៉ុបភាគច្រើនកំពុងលំបាកជាមួយបំណុលជាតិធំៗ មធ្យោបាយដែលល្អសម្រាប់ពួកគេក្នុងការផ្តល់ហិរញ្ញប្បទានដល់វិស័យការពារជាតិរបស់អ៊ុយក្រែន គឺការប្រើប្រាស់ទ្រព្យសម្បត្តិអធិបតេយ្យភាពរុស្ស៊ី ចំនួន ២១០ពាន់លានអឺរ៉ូ (២៤៤,១៥ ពាន់លានដុល្លារ) ដែលត្រូវបង្កកនៅអឺរ៉ុប បន្ទាប់ពីជម្លោះអ៊ុយក្រែន ឆាបឆេះក្នុងឆ្នាំ២០២២៕