អូស្ត្រាលី នៅថ្ងៃពុធ ទី១០ ខែធ្នូ នេះ បានក្លាយជាប្រទេសដំបូងគេនៅលើពិភពលោក ដែលបានអនុវត្តជាផ្លូវការនូវការហាមប្រាមមិនឱ្យកុមារអាយុក្រោម ១៦ឆ្នាំ ប្រើប្រាស់ប្រព័ន្ធផ្សព្វផ្សាយសង្គម ដោយរារាំងការចូលប្រើប្រាស់វេទិកានានា រួមមានកម្មវិធី TikTok កម្មវិធី YouTube របស់ក្រុមហ៊ុន Alphabet និងបណ្ដាញសង្គមល្បីៗដូចជា Instagram និង Facebook របស់ក្រុមហ៊ុន Meta ជាដើម។

បម្រាបបានចូលជាធរមានជាផ្លូវការហើយចាប់ពីពាក់កណ្តាលអធ្រាត្រឈានចូលថ្ងៃពុធនេះ ហើយវេទិកាធំបំផុតចំនួន១០ ត្រូវបានបញ្ជាឱ្យបិទគណនីរបស់យុវវ័យក្រោម ១៦ឆ្នាំ បើមិនដូច្នេះទេ នឹងរងការផាកពិន័យរហូតដល់ ៤៩,៥ លានដុល្លារអូស្ត្រាលី (ប្រមាណ ៣៣ លានដុល្លារអាមេរិក) ក្រោមច្បាប់ថ្មីនេះ ដែលបានទាក់ទាញការរិះគន់ពីក្រុមហ៊ុនបច្ចេកវិទ្យាធំៗ ប៉ុន្តែត្រូវបានស្វាគមន៍ដោយឪពុកម្តាយ និងអ្នកតស៊ូមតិកុមារជាច្រើន។

នាយករដ្ឋមន្ត្រីអូស្រ្តាលី លោក Anthony Albanese បានសាទរថា នេះជា "ថ្ងៃដ៏មោទនភាពបំផុត" សម្រាប់ក្រុមគ្រួសារអូស្រ្តាលី ហើយបានដាក់ច្បាប់នេះជាភស្តុតាងដែលបញ្ជាក់ថា អ្នកបង្កើតគោលនយោបាយអាចទប់ស្កាត់គ្រោះថ្នាក់តាមអ៊ីនធឺណិតបាន។

ប៉ុន្មានម៉ោងមុនពេលបម្រាមចូលជាធរមាន គណនីកុមារប្រមាណជាង ១លាននាក់ ដែលប៉ះពាល់ដោយច្បាប់នេះ ចាប់ផ្តើមបង្ហោះសារនិយាយពាក្យលា ទៅកាន់អ្នកតាមដានក្នុងអ៊ីនធឺណិតរបស់ពួកគេ៕