មន្ត្រីអាមេរិកមួយរូបបាននិយាយកាលពីថ្ងៃអង្គារ (៩ ធ្នូ) ថា កិច្ចព្រមព្រៀងពាណិជ្ជកម្មរបស់សហរដ្ឋអាមេរិក ដែលបានឈានដល់ជាមួយឥណ្ឌូនេស៊ី ក្នុងខែកក្កដា កំពុងជួបហានិភ័យនៃការដួលរលំ ដោយសារតែទីក្រុងហ្សាការតា បានដើរថយក្រោយលើការប្តេជ្ញាចិត្តមួយចំនួនដែលខ្លួនបានធ្វើ ជាផ្នែកមួយនៃកិច្ចព្រមព្រៀងនេះ។

មន្ត្រីដែលសុំមិនបញ្ចេញឈ្មោះនេះ បានប្រាប់សារព័ត៌មាន FT ថា៖ "ឥណ្ឌូនេស៊ីកំពុងបដិសេធចំពោះអ្វីដែលបានព្រមព្រៀងគ្នាក្នុងខែកក្កដា" ប៉ុន្តែមិនផ្តល់ព័ត៌មានលម្អិតជាក់លាក់ទេ។ គួរឱ្យដឹងថា កាលពីខែកក្កដា ភាគីទាំងពីរបាននិយាយថា ឥណ្ឌូនេស៊ីយល់ព្រមលុបបំបាត់ពន្ធលើទំនិញអាមេរិកជាង ៩៩% និងលុបចោលរបាំងមិនមែនពន្ធទាំងអស់លើក្រុមហ៊ុនអាមេរិក ខណៈសហរដ្ឋអាមេរិក នឹងទម្លាក់ពន្ធគំរាមកំហែងរបស់ខ្លួនលើផលិតផលឥណ្ឌូនេស៊ី មកត្រឹម ១៩% ពីអត្រា ៣២% ពីមុន។

ប្រធានាធិបតីអាមេរិក លោក Donald Trump បានប្រកាសជាលើកដំបូងនូវកិច្ចព្រមព្រៀងនេះ ក្នុងថ្ងៃទី១៥ ខែកក្កដា ដោយសាទរថាជា "ជ័យជម្នះដ៏ធំសម្រាប់ក្រុមហ៊ុនផលិតរថយន្ត ក្រុមហ៊ុនបច្ចេកវិទ្យា បុគ្គលិក កសិករ ម្ចាស់កសិដ្ឋាន និងអ្នកផលិតរបស់អាមេរិក"។ ប៉ុន្តែមន្ត្រីឥណ្ឌូនេស៊ី បានប្រាប់តំណាងពាណិជ្ជកម្មអាមេរិក លោក Jamieson Greer ថា ទីក្រុងហ្សាការតា មិនអាចយល់ព្រមចំពោះការសន្យាមានចំណងផ្លូវច្បាប់មួយចំនួនបានទេ ហើយចង់កែប្រែឡើងវិញ។

ប្រភពមន្ត្រីអាមេរិកនិយាយថា ក្រុមមន្ត្រីជឿថា ការកែប្រែនោះនឹងនាំទៅរកកិច្ចព្រមព្រៀងកាន់តែអាក្រក់ជាមួយអាមេរិក ជាងកិច្ចព្រមព្រៀងថ្មីៗ ដែលខ្លួនបានធ្វើជាមួយប្រទេសអាស៊ីអាគ្នេយ៍ផ្សេងទៀត៕