គណៈកម្មការរដ្ឋាភិបាលរបស់ប្រទេសជប៉ុន បានព្រមានអំពីការរញ្ជួយដីបន្ថែមទៀតអាចកើតមាន ដែលនឹងកើតឡើងក្នុងរយៈពេលប្រហែលមួយសប្តាហ៍ខាងមុខនៅក្នុងតំបន់នានាដែលរងគ្រោះដោយរញ្ជួយដីកម្រិត៧,៥រិចទ័រ កាលពីថ្ងៃចន្ទ។ ការរញ្ជួយដីដ៏ខ្លាំងក្លានេះ បានវាយប្រហារនៅឆ្នេរភាគខាងកើតនៃខេត្ត Aomori ភាគខាងជើងប្រទេសជប៉ុន។

ការរញ្ជួយដី បានជំរុញឱ្យទីភ្នាក់ងារឧតុនិយមជប៉ុនចេញការព្រមានអំពីរលកយក្សស៊ូណាមិ សម្រាប់តំបន់ដែលគ្របដណ្តប់លើផ្នែកមួយចំនួននៅកោះហុកកៃដូ និងតូហូគុ។ រហូតមកដល់ពេលនេះ មានអ្នករងរបួសសរុបចំនួន៥០នាក់ត្រូវបានរាយការណ៍នៅក្នុងខេត្តចំនួនបីរួមទាំងខេត្ត Aomori។ គណៈកម្មការកាលពីថ្ងៃអង្គារ បានរៀបចំកិច្ចប្រជុំវិសាមញ្ញមួយ ហើយបានធ្វើរបាយការណ៍ដោយផ្អែកលើទិន្នន័យដែលបានវិភាគអំពីសកម្មភាពរញ្ជួយដី។

កាលពីឆ្នាំ ១៩៤៣ រញ្ជួយដីកម្រិត៦,៦រ៉ិចទ័របានកើតឡើងនៅឆ្នេរសមុទ្រភាគខាងកើតខេត្ត Aomori ប្រហែលពីរថ្ងៃបន្ទាប់ពីការរញ្ជួយដីកម្រិត៧,១រ៉ិចទ័រ បានកើតឡើងនៅក្នុងតំបន់នោះ។ មន្ត្រីបានព្រមានថា មានហានិភ័យខ្ពស់នៃការរញ្ជួយដីកម្រិតខ្លាំងៗកើតឡើងតាមបណ្តោយលេណដ្ឋានជប៉ុន និងលេណដ្ឋាន Chishima នៅជិតកោះហុកកៃដូ។

សាស្ត្រាចារ្យ លោក Hirata Naoshi នៃសាកលវិទ្យាល័យតូក្យូ ដែលជាប្រធានគណៈកម្មាធិការ បានអំពាវនាវឱ្យប្រជាជនមានវិធានការទប់ទល់ការរញ្ជួយដី រួមទាំងការធ្វើឱ្យប្រាកដថា គ្រឿងសង្ហារឹមនៅក្នុងលំនៅឋាន ត្រូវបានធានាសុវត្ថិភាព និងការរៀបចំផែនការជម្លៀសឱ្យបានត្រឹមត្រូវ។