ក្រសួងការពារជាតិកូរ៉េខាងត្បូងបាននិយាយនៅថ្ងៃពុធ ១០ ធ្នូនេះ ថា កូរ៉េខាងជើងបានបាញ់សន្ធាប់ ដោយកាំភ្លើងផ្លោងចេញពីជើងទម្របាញ់គ្រាប់រ៉ូកែតពហុជំនាញកាលពីថ្ងៃអង្គារ ៩ ធ្នូ ឆ្ពោះទៅសមុទ្រនៅភាគខាងលិចនៃឧបទ្វីបកូរ៉េ។

ការបាញ់នេះកើតឡើង ខណៈកូរ៉េខាងជើងបានរៀបចំកិច្ចប្រជុំគណបក្សដ៏សំខាន់ ក្រោមវត្តមានរបស់មេដឹកនាំលោក Kim Jong Un ។កិច្ចប្រជុំនេះនឹងពិភាក្សាបញ្ហាគោលនយោបាយសំខាន់ៗ ព្រមទាំងផែនការនានាសម្រាប់វឌ្ឍនភាពរបស់គណបក្សពលករ និងចំណុចអាទិភាពដំបូងក្នុងពេល៥ឆ្នាំខាងមុខរបស់កូរ៉េខាងជើង។ 

ទីភ្នាក់ងារសារព័ត៌មាន Yonhap បានរាយការណ៍ដោយសំអាងប្រភពពីក្រុមមន្ត្រីយោធាថា ការបាញ់គ្រាប់កាំភ្លើងធំនេះគឺជាផ្នែកមួយនៃលំហាត់រដូវរងាជាទៀងទាត់របស់យោធាកូរ៉េខាងជើង។ 

យោធាកូរ៉េខាងត្បូងបានប្រទះឃើញគ្រាប់ផ្លោងជាច្រើនគ្រាប់ដែលបានបាញ់ឆ្ពោះទៅដែនទឹកភាគខាងជើងនៃសមុទ្រលឿងនៅម៉ោងប្រហែល១៥:០០ម៉ោងក្នុងស្រុកកាលពីថ្ងៃអង្គារ ហើយក្រុមអាជ្ញាធរចារកម្ម កូរ៉េខាងត្បូង និងសហរដ្ឋអាមេរិកកំពុងធ្វើការវិភាគលម្អិតអំពីលក្ខណៈបច្ចេកទេសរបស់គ្រាប់រ៉ូកែតទាំងនោះ។  យោធាកូរ៉េខាងត្បូងនិយាយក្នុងសេចក្តីថ្លែងការណ៍មួយថា យោធាកំពុងតាមដានយ៉ាងដិតដល់នូវសកម្មភាពផ្សេងៗរបស់កូរ៉េខាងជើងក្រោមជំហរការពារជាតិរួមគ្នារវាងកូរ៉េខាងត្បូង និងអាមេរិក និងរក្សាសមត្ថភាព និងជំហរដែលអាចឆ្លើយតបយ៉ាងខ្លាំងចំពោះការបង្កហេតុណាមួយ។

គួររម្លឹកថា កូរ៉េខាងជើងបានបាញ់មីស៊ីលបាលីស្ទីកមួយគ្រាប់ឆ្ពោះទៅសមុទ្រនៅឆ្នេរសមុទ្រភាគខាងកើតរបស់ខ្លួននៅថ្ងៃទី ៧ ខែវិច្ឆិកា បន្ទាប់ពីបានរិះគន់ទណ្ឌកម្មថ្មីរបស់សហរដ្ឋអាមេរិកប្រឆាំងនឹងបុគ្គល និងអង្គភាពកូរ៉េខាងជើងដែលទីក្រុងវ៉ាស៊ីនតោនបាននិយាយថាមានជាប់ពាក់ព័ន្ធនឹងគម្រោងលាងលុយកខ្វក់ទាក់ទងនឹងចោរព័ត៌មានវិទ្យា៕