មេដឹកនាំនៃប្លុកក្នុងតំបន់អាហ្រ្វិក បាននិយាយកាលពីថ្ងៃអង្គារ (៩ ធ្នូ) ថា រដ្ឋប្រហារ និងការប៉ុនប៉ងធ្វើរដ្ឋប្រហារជាច្រើនលើកច្រើនសារនៅអាហ្រ្វិកខាងលិច រួមជាមួយនឹងកំណើនបញ្ហាប្រឈមផ្នែកសន្តិសុខ បានធ្វើឱ្យតំបន់នេះស្ថិតនៅក្នុងគ្រាអាសន្នដ៏គ្រោះថ្នាក់។

លោក Omar Touray ដែលជាប្រធានសហគមន៍សេដ្ឋកិច្ចនៃគណៈកម្មការរដ្ឋអាហ្វ្រិកខាងលិច (ECOWAS) បានចេញការព្រមានបែបនេះ ទៅកាន់ក្រុមប្រឹក្សាសន្តិសុខនិងសម្របសម្រួលរបស់ប្លុក ក្រោយការប៉ុនប៉ងធ្វើរដ្ឋប្រហារបរាជ័យក្នុងប្រទេសបេណាំង ដែលជារលកចុងក្រោយបំផុតក្នុងរបបយោធា និងការប៉ុនប៉ងកាន់កាប់ដោយយោធាជាបន្តបន្ទាប់។ កាលពីខែមុន រដ្ឋប្រហារយោធានៅប្រទេសហ្គីណេប៊ីស្សូ ទើបតែបានផ្ដួលរំលំលោកអតីតប្រធានាធិបតី Umaro Embalo។

លោក Touray បាននិយាយថា "ដោយប្រឈមមុខនឹងស្ថានភាពនេះ ប្លុកអាចប្រកាសបានថា សហគមន៍អាហ្រ្វិកខាងលិច កំពុងស្ថិតក្នុងភាពអាសន្នហើយ"។ ភ្លាមៗនោះ គេមិនទាន់ដឹងច្បាស់ទេថា តើការប្រកាសរបស់លោក Touray មានលក្ខណៈផ្លូវការឬយ៉ាងណាឡើយ។

ប្រធានកម្មវិធីតំបន់សាហែល នៅមូលនិធិ Konrad Adenauer បាននិយាយថា សេចក្តីប្រកាសនេះ អាចជាការប៉ុនប៉ងដើម្បីស្ដារឡើងវិញនូវភាពជឿជាក់សម្រាប់ប្លុកនេះ បន្ទាប់ពីការគំរាមតែមាត់ដោយគ្មានសកម្មភាពជាក់ស្ដែងនៃអន្តរាគមន៍ ក្រោយរដ្ឋប្រហារនៅនីហ្សេរីយ៉ា កាលឆ្នាំ២០២៣ កន្លងទៅ៕