ក្រុមសិទ្ធិមនុស្សក្នុងតំបន់មួយបាននិយាយកាលពីថ្ងៃអង្គារ (៩ ធ្នូ) ថា មនុស្សរាប់សិបនាក់នៅរដ្ឋធានីប្រទេសហៃទី ត្រូវបានសម្លាប់ក្រោមរូបភាពដ៏ឃោរឃៅ បន្ទាប់ពីការប៉ះទង្គិចយ៉ាងហិង្សានៅក្នុងសម្ព័ន្ធក្រុមជនអន្ធពាលដ៏មានអំណាចមួយ ដោយកុមារចំនួន ១០នាក់ ស្ថិតក្នុងចំណោមជនរងគ្រោះ។

ក្នុងចំណោមអ្នកដែលត្រូវបានសម្លាប់នោះ រួមមានសមាជិកដ៏មានឥទ្ធិពលនៃក្រុមជនអន្ធពាល ក្នុងតំបន់សំណង់មិនរៀបរយ Bel-Air នៃទីក្រុងព័រអូប្រាំង។ ភ្លាមៗនោះ គេមិនទាន់ដឹងច្បាស់ឡើយថាស្ថានភាពហិង្សាធ្ងន់ធ្ងរកម្រិតណា ប៉ុន្តែមនុស្សជាច្រើនបារម្ភថា ការប៉ះទង្គិចគ្នាដែលចាប់ផ្តើមក្នុងប៉ុន្មានថ្ងៃចុងក្រោយនេះ អាចបង្កឱ្យមានអំពើហិង្សាកាន់តែខ្លាំងថែមទៀត នៅក្នុងទីក្រុងមួយដែលទឹកដី ៩០% ត្រូវបានគ្រប់គ្រងដោយក្រុមជនអន្ធពាលរួចទៅហើយ។

គួរឱ្យដឹងថា អំពើហិង្សាផ្ទៃក្នុងដ៏បង្ហូរឈាមបែបនេះគឺមិនមែនជារឿងធម្មតាទេ ព្រោះក្រុមជនអន្ធពាលមួយចំនួនធំ បានរួមគ្នាជាសម្ព័ន្ធមួយក្នុងខែកញ្ញា ឆ្នាំ២០២៣ ហើយបានប្រកាសបង្កើតក្រុមចម្រុះ Viv Ansanm ឬហៅថា "រស់នៅជាមួយគ្នា"។ សម្ព័ន្ធភាពបែបនេះបានធ្វើឱ្យអំពើហិង្សាដ៏កម្រោលធ្លាក់ចុះខ្លះ បន្ទាប់ពីក្រុមប្រដាប់អាវុធទាំងនោះ បានព្រមព្រៀងលែងប្រយុទ្ធគ្នា។

មកទល់ពេលនេះ ក្រុមសិទ្ធិមនុស្សនិយាយថា មនុស្សយ៉ាងតិច ៤៩នាក់ ត្រូវបានសម្លាប់យ៉ាងឃោរឃៅ ដូចជាដុតទាំងរស់ និងកាត់ខ្លួនប្រាណជាបំណែកៗជាដើម ចាប់តាំងពីថ្ងៃចន្ទដើមសប្ដាហ៍នេះមក។ ចំនួនមនុស្សស្លាប់ត្រូវបានរំពឹងថានឹងកើនឡើងថែមទៀត ដោយសារការប៉ះទង្គិចនៅតែបន្ត ហើយពុំមានអាជ្ញាធរ ឬក្រុមសិទ្ធិមនុស្សណាអាចចូលទៅក្នុងតំបន់នោះបានឡើយ៕