រដ្ឋមន្ត្រីការពារជាតិអូស្ត្រាលី លោក Richard Marles បាននិយាយថា អូស្ត្រាលី កំពុងសម្លឹងមើលឆ្ពោះទៅរកការប្រឹងប្រែងដោះស្រាយបញ្ហាប្រឈមនានា រួមទាំងកម្លាំងពលកម្មជំនាញ សម្រាប់កម្មវិធីនាវាមុជទឹកនុយក្លេអ៊ែរ AUKUS នៅមុនកិច្ចប្រជុំរដ្ឋមន្ត្រីការពារជាតិ AUKUS នៅទីក្រុងវ៉ាស៊ីនតោន។

មន្ត្រីសហរដ្ឋអាមេរិក បាននិយាយកាលពីសប្តាហ៍មុនថា ការពិនិត្យឡើងវិញរបស់មន្ទីរបញ្ចកោណនៃកម្មវិធី AUKUS បានរកឃើញចំណុច ដើម្បីដាក់កិច្ចព្រមព្រៀងមួយនៅលើ "ជំហរដ៏រឹងមាំបំផុត" ទោះបីជាការរកឃើញនេះមិនត្រូវបានផ្សព្វផ្សាយជាសាធារណៈក៏ដោយ។

ដោយប្រកាសនៅឆ្នាំ២០២១ កម្មវិធី AUKUS នេះជាគម្រោងការពារជាតិដ៏ធំបំផុតមិនធ្លាប់មានរបស់អូស្ត្រាលី ហើយនឹងមើលឃើញវត្តមាននាវាមុជទឹកថ្នាក់ Virginia របស់អាមេរិក មានមូលដ្ឋាននៅអូស្ត្រាលី ចាប់ពីឆ្នាំ២០២៧ តទៅ ខណៈនាវាមុជទឹក Virginia ជាច្រើនគ្រឿងទៀត នឹងត្រូវលក់ទៅឱ្យអូស្ត្រាលី ចាប់ពីឆ្នាំ២០៣០ ហើយចក្រភពអង់គ្លេស និងអូស្ត្រាលី ក៏នឹងសាងសង់នាវាមុជទឹកប្រភេទថ្មី AUKUS ដើរដោយថាមពលនុយក្លេអ៊ែរផងដែរ។

ក្នុងបទសម្ភាសន៍នៅថ្ងៃពុធ (១០ ធ្នូ) នេះ លោក Marles និយាយថា រដ្ឋមន្ត្រីការពារជាតិមកពីអូស្ត្រាលី អង់គ្លេស និងអាមេរិក នឹងជួបប្រជុំនៅទីក្រុងវ៉ាស៊ីនតោន នៅថ្ងៃពុធនេះ ម៉ោងក្នុងស្រុក ដើម្បីពិភាក្សាពី "មធ្យោបាយឆ្ពោះទៅមុខជាបន្ទាន់"។ ប្រមុខការពារជាតិរូបនេះលើកពីទំនុកចិត្តរបស់ខ្លួនថា អូស្ត្រាលីនឹងបំពេញតាមកាលកំណត់ ក្នុងការធ្វើជាម្ចាស់ផ្ទះនាវាមុជទឹក Virginia របស់អាមេរិក ចំនួន ៤គ្រឿង នៅមូលដ្ឋានទ័ពជើងទឹកនៃមហាសមុទ្រឥណ្ឌា ក្នុងទីក្រុង Perth ត្រឹមចុងឆ្នាំ២០២៧ ទោះបីជានៅមានបញ្ហាប្រឈមក៏ដោយ៕