បាល់ទាត់៖ ឯកឧត្ដម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជាបានមានប្រសាសន៍ថា ក្នុងនាមរាជរដ្ឋាភិបាលជប៉ុនតាមរយៈក្រុមហ៊ុនតៃខា ខេមបូឌា ខបភើរេសិន បានសន្យានឹងជួយសាងសង់ទីលាបាល់ទាត់ក្នុងសាលឲ្យបានយ៉ាងតិចមួយ ក្នុងមួយវិទ្យាល័យនៅកម្ពុជាដើម្បីលើកកម្ពស់សុខភាពតាមរយៈការលេងបាល់ទាត់។
ការសន្យានេះធ្វើឡើងក្នុងពិធីប្រគល់ និងទទួលតារាងបាល់ទាត់ក្នុងសាលដល់វិទ្យាល័យព្រែកលៀប ក្រោមវត្តមានឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា និងឯកឧត្ដម មិកាមិ ម៉ាសាហ៊ីរ៉ូ កាលពីថ្ងៃទី២៤ ខែកុម្ភៈ ឆ្នាំ២០២២ ម្សិលមិញ។ លោក ណូបូ កូបាយ៉ាស៊ី អគ្គនាយកក្រុមហ៊ុនតៃខា ខាំបូឌា ខបភើរេសិនបានបញ្ជាក់ថា ក្រុមហ៊ុនរបស់លោកបានបរិច្ចាគតារាងបាល់ទាត់ជារៀងរាល់ឆ្នាំក្នុងគោលបំណងពីរ ទី១-ដើម្បីគាំទ្រការលើកកម្ពស់សុខភាពតាមរយៈបាល់ទាត់ និងទី២-រួមចំណែកដល់ការរីកលូតលាស់របស់យុវជន ដោយការបរិច្ចាគផលិតផលដែលរួមបញ្ចូលផលិតផលតៃខាផងដែរ។ ដូច្នេះក្រុមហ៊ុនលោកនឹងបន្ដសាងសង់តារាងបាល់ទាត់ក្នុងសាលដល់វិទ្យាល័យផ្សេងៗក្នុងមួយឆ្នាំយ៉ាងតិចមួយទៀត ដើម្បីផ្ដល់ភាពងាយស្រួលឲ្យសិស្សានុសិស្ស និងយុវជនបានលេងកីឡាដើម្បីរឹតចំណងមិត្តភាព និងសុខភាពផង។
ទន្ទឹមជាមួយគ្នា ឯកឧត្តម មិកាមិ ម៉ាសាហ៊ីរ៉ូ បានប្ដេជ្ញានឹងធ្វើការជំរុញក្រុមហ៊ុនជប៉ុន ហើយនឹងជួយកម្ពុជាឱ្យរីកចម្រើនលើវិស័យកីឡា ជាក់ស្ដែងវិស័យកីឡាបាល់ទាត់ចាប់ផ្ដើមរីកចម្រើនម្តងបន្តិចៗ ហើយមិនយូរប៉ុន្មានវិស័យមួយនេះនឹងរីកចម្រើនខ្លាំងសំខាន់បានធ្វើឲ្យអ្នកគាំទ្រស្រឡាញ់ពេញចិត្ត ដូចនេះមិនយូរទេកីឡាបាល់ទាត់នៅកម្ពុជានឹងរីកចម្រើន។ ឯកឧត្ដម ហង់ ជួនណារ៉ុន មានប្រសាសន៍ថា ក្នុងនាមក្រសួងអប់រំ ឯកឧត្ដមបានអរគុណប្រជាជនជប៉ុន និងរាជរដ្ឋាភិបាលជប៉ុនដែលតែងយកចិត្តទុកដាក់ជួយកម្ពុជាលើគ្រប់វិស័យ ដោយឡែកវិស័យអប់រំ និងកីឡាក៏ភាគីជប៉ុនបានជួយច្រើនដែរ ហើយសង្ឃឹមថា ប្រជាជនជប៉ុន និងរាជរដ្ឋាភិបាលជប៉ុននឹងបន្តជួយកម្ពុជាលើគ្រប់វិស័យទៀត។ គួរបញ្ជាក់ថា តារាងបាល់ទាត់ក្នុងសាលនៅវិទ្យាល័យព្រែកលៀបនេះ មានតម្លៃប្រមាណជាង ៤ម៉ឺនដុល្លារដែលមានទទឹងជាង ២០ម៉ែត្រ និងបណ្ដោយជាង ៤០ម៉ែត្រ៕
អត្ថបទ៖ គង់ រ៉េន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
