ឧត្តរមានជ័យ៖ នាថ្ងៃទី១០ ខែធ្នូ ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បាន​អញ្ជើញ​ចុះ​ពិនិត្យ​ស្ថាន​ភាព​ប្រជា​ពលរដ្ឋ​ភៀសសឹក ក្នុងស្រុកអន្លង់វែង ដែលបានជម្លៀសមកពីតាមព្រំដែន។

តបតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ទៅ​លើ​សុខ​ទុក្ខ និងសុវត្ថិភាពរបស់ប្រជាពលរដ្ឋភៀសសឹកដែលបានជម្លៀសរហូតដល់រាប់ម៉ឺននាក់ ដើម្បី​រៀប​ចំ​មណ្ឌលសុវត្ថិភាពស្នាក់នៅបណ្តោះអាសន្នសមស្រប និងមាន​សុវត្ថិភាព​ខ្ពស់​ជូន​ប្រជា​ពលរដ្ឋ​។

អំឡុងចុះពិនិត្យនេះ ឯកឧត្តម ទេសរដ្ឋមន្រ្តី កោតសរសើរដល់អាជ្ញាធរខេត្ត ស្រុក និងមូលដ្ឋាន ដែល​បាន​អន្តរាគមន៍រៀបចំមណ្ឌលសុវត្ថិភាពទាន់ពេលវេលាជូនប្រជាពលរដ្ឋ ដើម្បី​បញ្ជៀស​ហានិភ័យ​ដែល​បង្កឡើងដោយកងទ័ព។

ជាមួយគ្នានេះ ឯកឧត្តម ទេសរដ្ឋមន្រ្តី បានណែនាំដល់អាជ្ញាធរត្រូវពិនិត្យ និងតាមដានឱ្យ​បាន​ម៉ត់​ចត់​រាល់​តម្រូវ​ការ​ចាំបាច់ដូចជា ស្បៀង សម្ភារៈប្រើប្រាស់ និងថ្នាំសង្កូវឱ្យបាន​គ្រប់​គ្រាន់​សម្រាប់​ចែក​ជូន​ប្រជាពលរដ្ឋ ហើយក្នុងករណីមានការខ្វះខាតស្នើទៅកាន់រដ្ឋបាលខេត្ត ដើម្បីចាត់​ចែង​ភ្លាម​ៗ​ជូន​ប្រជាពលរដ្ឋ។

លើសពីនេះ ឯកឧត្តម ទេសរដ្ឋមន្រ្តី បានស្នើឱ្យអាជ្ញាធរ​មាន​សមត្ថកិច្ច​គ្រប់​ជាន់​ថ្នាក់​ត្រូវ​ការ​ពារ​សុវត្ថិភាព សន្តិសុខ សណ្តាប់ធ្នាប់ ជាពិសេសត្រូវ​ចាត់​ឱ្យមា​ន​ក្រុម​គ្រូពេទ្យប្រចាំការ២៤ម៉ោងលើ២៤ម៉ោង ដើម្បីតាមដាន ពិនិត្យ និងសង្គ្រោះបានទាន់ពេលវេលាជូនប្រជាពលរដ្ឋភៀសសឹកដែលស្នាក់នៅមណ្ឌលសុវត្ថិភាព៕