អ្នកនាំពាក្យរបស់លោកបាននិយាយកាលពីថ្ងៃអង្គារថា អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានថ្កោលទោសការបញ្ជូនរបស់ក្រុមហ៊ួទីនូវបុគ្គលិករបស់UN ទៅកាន់តុលាការព្រហ្មទណ្ឌពិសេសរបស់ពួកគេ។ 

អ្នកនាំពាក្យលោក Stephane Dujarric បានអះអាងនៅក្នុងសេចក្តីថ្លែងការណ៍មួយថា៖«លោកអគ្គលេខាធិការមានការព្រួយបារម្ភយ៉ាងខ្លាំងអំពីការឃុំខ្លួនដោយបំពានជាបន្តបន្ទាប់នូវបុគ្គលិកUN ចំនួន ៥៩ នាក់ បន្ថែមពីលើអង្គការមិនមែនរដ្ឋាភិបាលរាប់សិបនាក់ សង្គមស៊ីវិល និងបុគ្គលិកបេសកកម្មការទូត»។ 

សេចក្តីថ្លែងការណ៍នេះ បានឲ្យដឹងថា បុគ្គលិកអង្គការសហប្រជាជាតិ ត្រូវបានឃុំខ្លួនដោយគ្មានទំនាក់ទំនងគ្នា ដោយអ្នកខ្លះត្រូវបានឃុំខ្លួន អស់រយៈពេលជាច្រើនឆ្នាំ ដោយពុំមានដំណើរការត្រឹមត្រូវណាមួយឡើយ ដែលជាការរំលោភលើច្បាប់អន្តរជាតិ។

សេចក្តីថ្លែងការណ៍នេះ បានបន្ថែមថា៖«បុគ្គលិកអង្គការសហប្រជាជាតិ រួមទាំងអ្នកដែលជាជនជាតិយេ  ម៉ែន មិនមានទោសពីដំណើរការផ្លូវច្បាប់ទាក់ទងនឹងសកម្មភាពទាំងអស់ដែលពួកគេអនុវត្តក្នុងឋានៈផ្លូវការរបស់ពួកគេ»។

អង្គការសហប្រជាជាតិអំពាវនាវឲ្យក្រុមហ៊ួទីបញ្ឈប់ការបញ្ជូននេះ និងធ្វើការដោយស្មោះត្រង់ឆ្ពោះទៅរកការដោះលែងជាបន្ទាន់នូវបុគ្គលិកដែលត្រូវបានឃុំខ្លួនទាំងអស់របស់អង្គការសហប្រជាជាតិ អង្គការមិនមែនរដ្ឋាភិបាល និងសហគមន៍ការទូត។

សេចក្តីថ្លែងការណ៍បានបញ្ជាក់ថា៖«អង្គការសហប្រជាជាតិនៅតែប្តេជ្ញាចិត្តក្នុងការគាំទ្រប្រជាជនយេម៉ែន និងផ្តល់ជំនួយមនុស្សធម៌តាមគោលការណ៍»៕