ជាលើកដំបូង សហរដ្ឋអាមេរិកបានរិះគន់ប្រទេសចិន ចំពោះការបញ្ចាំងរ៉ាដាសំដៅទៅលើយន្តហោះយោធាជប៉ុន អំឡុងពេលធ្វើសមយុទ្ធហ្វឹកហ្វឺន កាលពីសប្តាហ៍មុន ជាឧប្បត្តិវហេតុដែលប្រទេសជិតខាងអាស៊ីទាំង២ បានផ្តល់សាច់រឿងខុសគ្នា ស្របពេលភាពតានតឹងកើនឡើងកាន់តែខ្លាំង។

ការប្រឈមមុខដាក់គ្នា នៅជិតប្រជុំកោះ Okinawa របស់ប្រទេសជប៉ុននេះ បានកើតឡើងបន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បង្កឲ្យមានជម្លោះជាមួយទីក្រុងប៉េកាំង កាលពីខែមុន ដោយសារការកត់សម្គាល់របស់លោកស្រី អំពីវិធីដែលទីក្រុងតូក្យូអាចនឹងឆ្លើយតប ចំពោះការវាយប្រហារដោយសន្មតរបស់ចិន លើកោះតៃវ៉ាន់។

ប្រទេសចិនអះអាងសិទ្ធិលើតៃវ៉ាន់ដែលជាកោះស្វ័យគ្រប់គ្រងតាមបែបប្រជាធិបតេយ្យ ហើយមិនបានច្រានចោលនូវការប្រើប្រាស់កម្លាំង ដើម្បីគ្រប់គ្រងកោះនេះ ដែលស្ថិតនៅចម្ងាយជាង ១០០គីឡូម៉ែត្រ ពីទឹកដីជប៉ុន ហើយត្រូវបានហ៊ុមព័ទ្ធដោយផ្លូវសមុទ្រដែលទីក្រុងតូក្យូពឹងផ្អែកលើ។

ដោយសំដៅទៅលើឧប្បត្តិហេតុបញ្ចាំងរ៉ាដានេះ អ្នកនាំពាក្យក្រសួងការបរទេស បានឲ្យដឹងកាលពីល្ងាចថ្ងៃអង្គារ (ទី៩ ខែធ្នូ) ថា៖ «សកម្មភាពរបស់ចិន មិនអំណោយផលដល់សន្តិភាព និងស្ថិរភាពក្នុងតំបន់ឡើយ។ សម្ព័ន្ធភាពអាមេរិក-ជប៉ុន កាន់តែរឹងមាំ និងរួបរួមគ្នាជាងពេលណាៗទាំងអស់។ ការប្តេជ្ញាចិត្តរបស់យើងចំពោះជប៉ុន ដែលជាសម្ព័ន្ធមិត្តរបស់យើង គឺមិនផ្លាស់ប្តូរឡើយ ហើយយើងកំពុងទាក់ទងយ៉ាងជិតស្និទ្ធ ជុំវិញបញ្ហានេះ និងបញ្ហាផ្សេងទៀត»។

នាយខុទ្ទកាល័យជប៉ុន លោក Minoru Kihara បានស្វាគមន៍ ចំពោះការលើកឡើងនេះ ដោយនិយាយថា នោះ «បង្ហាញពីសម្ព័ន្ធភាពដ៏រឹងមាំ រវាងសហរដ្ឋអាមេរិក និងជប៉ុន»។ ក្រសួងការបរទេសចិន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕