បើយោងតាមរបាយការណ៍ចេញផ្សាយកាលពីថ្ងៃអង្គារ (ទី៩ ខែធ្នូ) ដោយមជ្ឈមណ្ឌលស្រាវជ្រាវ Pew បានបង្ហាញថា ក្មេងជំទង់ជនជាតិអាមេរិក ភាគច្រើនប្រើប្រាស់បណ្ដាញសង្គម YouTube និង TikTok រៀងរាល់ថ្ងៃ ហើយប្រហែល ២០ភាគរយ បានប្រាប់ថា ពួកគេប្រើវេទិកាមួយ ក្នុងចំណោមវេទិកាទាំង២ «ស្ទើរតែជាប់រហូត»។

ការស្ទង់មតិដែលបានមើលលើទម្លាប់របស់ក្មេងជំទង់ ១.៤៥៨នាក់ ដែលមានអាយុចន្លោះពី ១៣ ទៅ ១៧ឆ្នាំ បានបង្ហាញថា ទោះបីជាមានការព្រួយបារម្ភកាន់តែខ្លាំងឡើង អំពីហានិភ័យសុខភាពផ្លូវចិត្តក៏ដោយ ក៏ក្មេងជំទង់ទាំងនោះមិនទម្លាក់ទូរសព្ទរបស់ពួកគេដែរ ដោយចំណាយពេលភាគច្រើនរបស់ពួកគេ ក្នុងការអូសចុះ-ឡើងលើបណ្ដាញសង្គម មើលវីដេអូ ឬប្រឹក្សាជាមួយកម្មវិធីបច្ចេកវិទ្យា ដែលដំណើរការដោយបញ្ញាសិប្បនិម្មិត (AI)។

ទោះបីជា YouTube គឺជាវេទិកាបណ្ដាញសង្គមដ៏ពេញនិយមបំផុត ដោយត្រូវបានប្រើប្រាស់ប្រចាំថ្ងៃ ដោយអ្នកចូលរួមចំនួន ៣ភាគ៤ នៅក្នុងការសិក្សាក៏ដោយ ក៏ TikTok, Instagram និង Snapchat នៅតែមានប្រជាប្រិយភាពខ្ពស់ សម្រាប់យុវវ័យ។ ចំណែកបណ្ដាញសង្គម Facebook មានការប្រើប្រាស់តិចតួច។

លោកស្រី Michelle Faverio សហការីស្រាវជ្រាវជាមួយអង្គភាព Pew និងជាអ្នកនិពន្ធនាំមុខគេ ពាក់ព័ន្ធនឹងរបាយការណ៍ថ្មីនេះ បាននិយាយថា «ប្រហែល ១ភាគ៣នៃក្មេងជំទង់ និយាយថា ពួកគេប្រើប្រាស់ស្ទើរឥតសម្រាកយ៉ាងហោចណាស់មួយ ក្នុងចំណោមបណ្ដាញសង្គមចំនួន ៥ ហើយ ឥឡូវនេះ ចំនួននោះបានបន្តមានរហូតអស់រយៈពេលជាច្រើនឆ្នាំ»។ 

លើសពីនោះទៀត របាយការណ៍ក៏បានបង្ហាញផងដែរថា ក្មេងជំទង់ជាច្រើនតែងតែប្រើប្រាស់កម្មវិធីបច្ចេកវិទ្យា AI ជាប្រចាំ៕