អធិការបតីអាល្លឺម៉ង់ លោក Friedrich Merz កាលពីថ្ងៃអង្គារ (ទី៩ ខែធ្នូ) បានសម្តែងការគាំទ្រយ៉ាងខ្លាំងចំពោះដំណើរការធ្វើឲ្យមានប្រក្រតីភាព រវាងអាមេនី និងអាស៊ែបៃហ្សង់ ដោយនិយាយថា កិច្ចព្រមព្រៀងសន្តិភាពនាពេលថ្មីៗនេះរបស់ប្រទេសទាំង២ បានបើក «ឱកាសជាប្រវត្តិសាស្ត្រ» សម្រាប់តំបន់នេះ។

អំឡុងពេលថ្លែង នៅឯសន្និសីទសារព័ត៌មានរួមជាមួយនាយករដ្ឋមន្ត្រីអាមេនី លោក Nikol Pashinyan នៅទីក្រុងប៊ែរឡាំង លោក Merz បាននិយាយថា ប្រទេសអាល្លឺម៉ង់នឹងគាំទ្រកិច្ចសហប្រតិបត្តិការកាន់តែជិតស្និទ្ធ រវាងសហភាពអឺរ៉ុប (EU) អាមេនី និងអាស៊ែបៃហ្សង់។ លោកបានលើកឡើងពីឱកាសមានកិច្ចសហប្រតិបត្តិការដោយជោគជ័យ នៅក្នុងវិស័យថាមពល ពាណិជ្ជកម្ម និងវិស័យផ្សេងៗទៀត។

ជាមួយគ្នានេះ មេដឹកនាំក្រុមអភិរក្សនិយម បានលើកឡើងទៀតថា៖ «កិច្ចព្រមព្រៀងសន្តិភាព រវាងអាមេនី និងអាស៊ែបៃហ្សង់ គឺជាសញ្ញានៃក្តីសង្ឃឹម សម្រាប់សន្តិភាព និងវិបុលភាព នៅក្នុងពិភពលោកនេះ និងតំបន់កូកាសខាងត្បូង (South Caucasus) ហើយវាបញ្ជូននូវសញ្ញាវិជ្ជមានដ៏សំខាន់មួយហួសពីតំបន់នេះ»។

មេដឹកនាំអាល្លឺម៉ង់ បានបន្ថែមថា៖ «តាមទស្សនៈរបស់យើង ឥឡូវនេះ វាមានសារៈសំខាន់ណាស់ដែលអាមេនី និងអាស៊ែបៃហ្សង់បន្តចាត់វិធានការនៅសល់ជាមួយគ្នា និងដោយសន្តិវិធី ហើយបញ្ហាធំៗអាចត្រូវបានដោះស្រាយដោយមិត្តភាព»។ លោកបានបញ្ជាក់ថា អាល្លឺម៉ង់នឹងបន្តគាំទ្រប្រទេសទាំង ២ លើផ្លូវនេះ៕