ទីភ្នាក់ងារសារព័ត៌មានរដ្ឋ បានរាយការណ៍ថា នាព្រឹកព្រលឹមថ្ងៃពុធ (ទី១០ ខែធ្នូ) នេះ មនុស្សយ៉ាងហោចណាស់ ១៩នាក់ បានបាត់បង់ជីវិត និង ១៦នាក់ទៀតបានរងរបួស ដោយសារការបាក់រលំអគារចំនួន ២ខ្នង នៅក្នុងទីក្រុង Fez ភាគឦសាន ដែលជាអតីតរដ្ឋធានីរបស់ប្រទេសម៉ារ៉ុក។

ទីភ្នាក់ងារសារព័ត៌មានរដ្ឋបានឲ្យដឹងទៀតថា អាជ្ញាធរក្នុងតំបន់ នៅខេត្ត Fez បានរាយការណ៍ថា អគារកម្ពស់ ៤ជាន់នៅជាប់គ្នា ២ខ្នង បានបាក់រលំ នាពេលយប់។ សាព័ត៌មាននេះ បានបន្ថែមថា អគារទាំង ២នេះ ជាកន្លែងរស់នៅរបស់មនុស្ស ៨គ្រួសារ ហើយស្ថិតនៅក្នុងសង្កាត់ Al-Mustaqbal ។

សេចក្តីរាយការណ៍បន្តថា ភ្លាមៗ ពេលទទួលបានដំណឹងពីឧបទ្ទវហេតុនេះ អាជ្ញាធរមូលដ្ឋាន សេវាសន្តិសុខ និងអង្គភាពការពារស៊ីវិល បានចុះទៅដល់កន្លែងកើតហេតុ ហើយបានចាប់ផ្តើមប្រតិបត្តិការស្វែងរក និងសង្គ្រោះភ្លាមៗ។

ទីភ្នាក់ងារសារព័ត៌មានបានបន្ថែមថា អ្នករងរបួសត្រូវបានបញ្ជូនទៅកាន់មជ្ឈមណ្ឌលមន្ទីរពេទ្យសាកលវិទ្យាល័យ ក្នុងទីក្រុង Fez ខណៈដែលប្រតិបត្តិការស្វែងរក និងជួយសង្គ្រោះ បានបន្តយ៉ាងសស្រាក់សស្រាំ ដើម្បីស្វែងរកអ្នកផ្សេងទៀតដែលអាចនៅតែជាប់នៅក្រោមគំនរបាក់បែក៕