ពិធីបុណ្យពន្លឺរបស់ឥណ្ឌា គឺ Diwali ត្រូវបានប្រកាសនៅថ្ងៃពុធ (ទី១០ ខែធ្នូ) នេះថា ជាផ្នែកមួយនៃការបញ្ចូលបន្ថែមទៅក្នុងបញ្ជីបេតិកភណ្ឌវប្បធម៌អរូបីរបស់អង្គការយូណេស្កូ (UNESCO) ជាដំណឹងដែលបង្កឲ្យមានការអបអរនៅក្នុងប្រទេស។

ទីភ្នាក់ងារវប្បធម៌របស់អង្គការសហប្រជាជាតិ (UN) មួយនេះ ដែលកំពុងមានកិច្ចប្រជុំនៅរដ្ឋធានី New Delhi របស់ប្រទេសឥណ្ឌា ពីថ្ងៃអង្គារ ដល់ថ្ងៃព្រហស្បតិ៍ កំពុងពិនិត្យមើលការជ្រើសរើសដាក់បញ្ចូលជាបេតិកភណ្ឌរាប់សិប មកពី ៧៨ប្រទេស។

សេចក្តីប្រកាសថ្មី នឹងចុះក្នុងបញ្ជីបេតិកភណ្ឌវប្បធម៌របស់អង្គការយូណេស្កូ ដែលគោលបំណង គឺដើម្បី «លើកកម្ពស់ការយល់ដឹង អំពីភាពចម្រុះនៃប្រពៃណីទាំងនេះ» និងធ្វើការការពារ នាពេលអនាគត។

នាយករដ្ឋមន្ត្រីឥណ្ឌា លោក Narendra Modi បានស្វាគមន៍ការប្រកាសនេះ ដោយនិយាយថា ពិធីបុណ្យនេះ គឺ «មានទំនាក់ទំនងយ៉ាងជិតស្និទ្ធទៅនឹងវប្បធម៌ និងប្រពៃណីរបស់យើង»។

រដ្ឋាភិបាលទីក្រុង Delhi កំពុងរៀបចំព្រឹត្តិការណ៍ជាច្រើន ក្នុងនោះរួមទាំងការបំភ្លឺជាពិសេសលើអគារនានា និងការតុបតែងនៅតាមដងផ្លូវសំខាន់ៗ រួមជាមួយនឹងពិធីបំភ្លឺចង្កៀងដ៏ធំ។

ជាពិធីបុណ្យដ៏សំខាន់បំផុតមួយរបស់សាសនាហិណ្ឌូ ប្រជាជនឥណ្ឌារាប់លាននាក់ ប្រារព្ធពិធីបុណ្យ Diwali ដែលត្រូវបានគេស្គាល់ថា Deepavali មិនត្រឹមតែនៅក្នុងប្រទេសឥណ្ឌាប៉ុណ្ណោះទេ ប៉ុន្តែថែមទាំងនៅទូទាំងពិភពលោកទៀតផង។ មនុស្សជាច្រើន ក្នុងនោះរួមទាំងអ្នកមកពីសហគមន៍ Sikh និង Jain ផងដែរ ប្រារព្ធវាជាពិធីបុណ្យរយៈពេល ៥ថ្ងៃ ដែលជានិមិត្តរូបនៃជ័យជម្នះរបស់អំពើល្អលើអំពើអាក្រក់៕