តាមរយៈវិទ្យុសាធារណៈ នាថ្ងៃពុធ (ទី១០ ខែធ្នូ) នេះ រដ្ឋមន្ត្រីក្រសួងការពារជាតិ លោក Wladyslaw Kosiniak-Kamysz បានប្រាប់ឲ្យដឹងថា ប្រទេសប៉ូឡូញកំពុងពិភាក្សា អំពីការផ្ទេរយន្តហោះចម្បាំង MiG-29 ទៅកាន់ប្រទេសអ៊ុយក្រែន ជាថ្នូរនឹងលទ្ធភាពទទួលបានបច្ចេកវិទ្យាយានដ្រូនរបស់ទីក្រុងគីវ។

រដ្ឋមន្ត្រីការពារជាតិរូបនេះ បាននិយាយថា៖ «នៅពេលណាមួយ យន្តហោះ MiG-29 នឹងលែងប្រើការនៅក្នុងកងទ័ពអាកាសប៉ូឡូញទៀតហើយ ដោយសារតែអាយុកាលសេវាកម្មរបស់ពួកវាចុះខ្សោយ។ យើងកំពុងចរចាជាមួយភាគីអ៊ុយក្រែន អំពីការផ្ទេរយន្តហោះចម្បាំង MiG-29 ប៉ុន្តែយើងក៏កំពុងពិភាក្សា អំពីការផ្ទេរបច្ចេកវិទ្យាមកកាន់ប្រទេសប៉ូឡូញវិញដែរ ដូចជាយានដ្រូនជាដើម។ សាមគ្គីភាពនេះត្រូវតែមានទៅមានមក»។

អគ្គសេនាធិការកងទ័ពប៉ូឡូញ បានឲ្យដឹងថា ការផ្ទេរដែលអាចកើតមាន ត្រូវបានផ្សារភ្ជាប់ទៅនឹងការមិនរំពឹងទុក ក្នុងការធ្វើទំនើបកម្មបន្ថែមទៀតលើយន្តហោះចម្បាំង MiG-29 ផលិតដោយសូវៀតដ៏ហួសសម័យនេះ។

នៅក្នុងសេចក្តីថ្លែងការណ៍មួយដែលបានចេញផ្សាយកាលពីល្ងាចថ្ងៃអង្គារកងទ័ពបានឲ្យដឹងថា៖ «វានឹងជាធាតុផ្សំនៃគោលនយោបាយសម្ព័ន្ធមិត្ត ក្នុងការគាំទ្រអ៊ុយក្រែន និងការថែរក្សាសន្តិសុខព្រំដែនប៉ែកខាងកើតរបស់អង្គការណាតូ»។

យ៉ាងណាក្ដី កងទ័ពបានកត់សម្គាល់ថា ការសម្រេចចិត្តចុងក្រោយមិនទាន់ត្រូវបានធ្វើឡើងនៅឡើយទេ។ ភារកិច្ចរបស់យន្តហោះ MiG នឹងត្រូវបានអនុវត្តជំនួសដោយយន្តហោះ F-16 និង FA-50៕