បន្ទាប់ពីសហរដ្ឋអាមេរិកបានចេញផ្សាយនូវយុទ្ធសាស្ត្រសន្តិសុខជាតិរបស់ខ្លួន ហើយលោកប្រធានាធិបតី Donald Trump បាននិយាយថា អឺរ៉ុប «កំពុងទន់ខ្សោយ» នោះ នាយករដ្ឋមន្ត្រីអង់គ្លេស លោក Keir Starmer នៅថ្ងៃពុធ (ទី១០ ខែធ្នូ) នេះ បានលើកឡើងថា ទ្វីបនេះ គឺ «រឹងមាំ» និង «រួបរួមគ្នា» នៅពីក្រោយប្រទេសអ៊ុយក្រែន។

យុទ្ធសាស្ត្រដែលត្រូវបានចេញផ្សាយកាលពីសប្តាហ៍មុន បានព្រមានថា អឺរ៉ុបប្រឈមនឹង «ការលុបបំបាត់អរិយធម៌» ហើយត្រូវតែផ្លាស់ប្តូរទិសដៅ។ នៅក្នុងបទសម្ភាសន៍ជាមួយសារព័ត៌មាន Politico កាលពីថ្ងៃអង្គារ លោក Trump បានហៅមេដឹកនាំនយោបាយរបស់អឺរ៉ុបថា «មានភាពទន់ខ្សោយ»។

ជាការឆ្លើយតបទៅនឹងសំណួររបស់សមាជិកសភាអង់គ្លេសនៅក្នុងរដ្ឋសភា ពាក់ព័ន្ធនឹងយុទ្ធសាស្ត្រសន្តិសុខជាតិរបស់សហរដ្ឋអាមេរិក លោក Starmer បានឆ្លើយតបថា អឺរ៉ុបមានភាពរឹងមាំ។

លោកបានបញ្ជាក់ថា៖ «អ្វីដែលខ្ញុំឃើញ គឺអឺរ៉ុបដ៏រឹងមាំមួយ រួបរួមគ្នានៅពីក្រោយអ៊ុយក្រែន និងរួបរួមគ្នានៅពីក្រោយតម្លៃនៃសេរីភាព និងលទ្ធិប្រជាធិបតេយ្យដ៏យូរអង្វែងរបស់យើង ហើយខ្ញុំនឹងក្រោកឈរឡើងការពារសេរីភាពទាំងនោះជានិច្ច»៕