ប៉េតង់៖ ការប្រកួតកីឡាប៉េតង់ជ្រើសរើសថ្នាក់តំបន់ប្រចាំមណ្ឌលខេត្តបាត់ដំបូង ដែលមានកីឡាករ-កីឡាការិនីមកពី ៦ខេត្តចូលរួមបានបញ្ចប់ដោយជោគជ័យ ក្រោយដំណើរការប្រកួត ២ថ្ងៃកាលពីថ្ងៃទី២២-២៣ ខែកុម្ភៈនៅទីលានប៉េតង់មន្ទីរអប់រំ យុវជន និងកីឡាខេត្តបាត់ដំបង ខណៈក្រុមម្ចាស់ផ្ទះដណ្ដើមបានមេដាយច្រើនជាងគេ។
ពិធីបិទការប្រកួតបានធ្វើឡើងក្រោមវត្តមានឯកឧត្តម ធូ ភា អភិបាលរងខេត្តបាត់ដំបូង និងមានការចូលរួមពីលោក យី សុងគី ប្រធានមន្ទីរអប់រំ យុវជន និងកីឡាខេត្ដបាត់ដំបង។ ចំពោះកីឡាករ-កីឡាការិនីចូលរួមមានចំនួន ៤១នាក់មកពីខេត្តពោធិ៍សាត់ កំពង់ឆ្នាំង ប៉ៃលិន បន្ទាយមានជ័យ ឧត្តរមានជ័យ និងម្ចាស់ផ្ទះខេត្តបាត់ដំបង ដែលប្រកួតលើ ៦វិញ្ញាសារួមមាន ៣នាក់ទល់ ៣នាក់បុរស-នារី, ១នាក់ទល់ ១នាក់ផ្នែកយុវជន និងយុវនារី និងវិញ្ញាសាវាយយកពិន្ទុបុរស-នារី។
ជាលទ្ធផលក្រោយប្រកួតដ៏ស្វិតស្វាញរយៈពេល ២ថ្ងៃ គេឃើញក្រុមកីឡាប៉េតង់ខេត្តបាត់ដំបងបានឈរកំពូលតារាងមេដាយ ដោយដណ្ដើមបានមេដាយមាស ៣ ប្រាក់ ១ និងសំរឹទ្ធ ២ សរុប ៦គ្រឿង ខណៈខេត្តប៉ៃលិនឈ្នះមេដាយមាស ២ និងសំរឹទ្ធ ២ ឈរលេខ២។ រីឯខេត្តឧត្ដរមានជ័យឈរលេខ៣ ដណ្ដើមបានមេដាយមាស ១ និងប្រាក់ ៣, ខេត្តពោធិ៍សាត់ឈរលេខ៤ ដណ្ដើមបានមេដាយប្រាក់ ២, ខេត្តបន្ទាយមានជ័យឈរលេខ៥ ដណ្ដើមបានមេដាយប្រាក់ ១ និងសំរឹទ្ធ ១ និងខេត្តកំពង់ឆ្នាំងឈរលេខ៦ ដណ្ដើមបានមេដាយសំរឹទ្ធ ១៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
