អង្គការលើកលែងទោសអន្តរជាតិនៅថ្ងៃព្រហស្បតិ៍ ទី១១ ខែធ្នូនេះ បានចោទប្រកាន់ក្រុមហាម៉ាស និងក្រុមប្រដាប់អាវុធប៉ាឡេស្ទីនដទៃទៀតពីបទឧក្រិដ្ឋកម្មប្រឆាំងមនុស្សជាតិ រួមទាំងការសម្លាប់រង្គាល ក្នុងអំឡុងពេលនិងក្រោយការវាយប្រហារនៅថ្ងៃទី៧ ខែតុលា ឆ្នាំ២០២៣ ដែលបានបង្កឱ្យមានសង្គ្រាមនៅតំបន់ហ្កាហ្សា។

អង្គការឃ្លាំមើលសិទ្ធិមនុស្ស បាននិយាយនៅក្នុងរបាយការណ៍ចំនួន១៧៣ទំព័រថា «ក្រុមប្រដាប់អាវុធប៉ាឡេស្ទីន បានប្រព្រឹត្តការរំលោភបំពានលើច្បាប់មនុស្សធម៌អន្តរជាតិ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិក្នុងអំឡុងពេលវាយប្រហាររបស់ខ្លួននៅភាគខាងត្បូងប្រទេសអ៊ីស្រាអែលដែលបានចាប់ផ្តើមនៅថ្ងៃទី៧ ខែតុលា ឆ្នាំ២០២៣»។

អង្គការលើកលែងទោសបាននិយាយថា ការសម្លាប់រង្គាលជនស៊ីវិលនៅថ្ងៃទី៧ ខែតុលា គឺស្មើនឹង «ឧក្រិដ្ឋកម្មប្រឆាំងមនុស្សជាតិនៃការសម្លាប់រង្គាល»។

ក្រុមសិទ្ធិមនុស្ស ក៏បានចោទប្រកាន់អ៊ីស្រាអែលពីបទប្រព្រឹត្តអំពើប្រល័យពូជសាសន៍នៅក្នុងយុទ្ធនាការសងសឹករបស់ខ្លួននៅតំបន់ហ្កាហ្សា ជាការចោទប្រកាន់ដែលអ៊ីស្រាអែលបានច្រានចោលយ៉ាងដាច់ខាត។

អង្គការលើកលែងទោសបាននិយាយថា ក្រុមហាម៉ាស និងក្រុមប្រដាប់អាវុធប៉ាឡេស្ទីនដទៃទៀតនៅហ្កាហ្សា «បានបន្តប្រព្រឹត្តការរំលោភបំពាន និងឧក្រិដ្ឋកម្មក្រោមច្បាប់អន្តរជាតិ ក្នុងការឃុំឃាំងនិងប្រព្រឹត្តអាក្រក់ចំពោះចំណាប់ថ្នូរ និងមិនព្រមប្រគល់សាកសពអ្នកស្លាប់ដែលត្រូវបានចាប់ឃុំខ្លួន។