ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃពុធ ទី១០ ខែធ្នូ ថា លោកបានពិភាក្សាជាមួយសភាអ៊ុយក្រែនអំពីបញ្ហាផ្លូវច្បាប់និងបញ្ហាផ្សេងៗទៀតទាក់ទងទៅនឹងលទ្ធភាពនៃការរៀបចំការបោះឆ្នោត និងបានជំរុញឱ្យប្រទេសដទៃទៀត រួមទាំងសហរដ្ឋអាមេរិក កុំដាក់សម្ពាធលើបញ្ហានេះ។

លោក Zelenskyy បាននិយាយថា លោកបានត្រៀមរួចរាល់ ដើម្បីរៀបចំការបោះឆ្នោតក្នុងរយៈពេលបីខែខាងមុខ ប្រសិនបើសហរដ្ឋអាមេរិក និងសម្ព័ន្ធមិត្តផ្សេងទៀតរបស់ទីក្រុងគីវ អាចធានាបាននូវសុវត្ថិភាពនៃការបោះឆ្នោត។

លោកបានឆ្លើយតបទៅនឹងការថ្លែងលើកឡើងរបស់ប្រធានាធិបតីសហរដ្ឋអាមេរិក លោក Donald Trump ដែលបាននិយាយថា រដ្ឋាភិបាលអ៊ុយក្រែនកំពុងប្រើប្រាស់សង្គ្រាមជាលេសដើម្បីបញ្ចៀសការបោះឆ្នោត។ លោក Zelenskyy បាននិយាយថា លោកបាន «ពិភាក្សាស៊ីជម្រៅ» ជាមួយសមាជិកសភា ហើយ«ប្រសិនបើដៃគូ រួមទាំងដៃគូសំខាន់របស់យើងនៅទីក្រុងវ៉ាស៊ីនតោន និយាយជាក់លាក់អំពីការបោះឆ្នោតនៅអ៊ុយក្រែន អំពីការបោះឆ្នោតក្រោមច្បាប់អាជ្ញាសឹក នោះយើងត្រូវតែផ្តល់ចម្លើយស្របច្បាប់របស់អ៊ុយក្រែនចំពោះរាល់សំណួរ និងរាល់ការសង្ស័យ»។ លោក Zelenskyy បាននិយាយថា «វាមិនងាយស្រួលទេ ប៉ុន្តែសម្ពាធលើបញ្ហានេះ ពិតជាពុំមែនជាអ្វីដែលយើងត្រូវការទេ។ ខ្ញុំរំពឹងថាសមាជិកសភានឹងលើកឡើងពីទស្សនៈរបស់ខ្លួន។ បញ្ហាប្រឈមសន្តិសុខអាស្រ័យលើដៃគូ ជាពិសេសសហរដ្ឋអាមេរិក។ បញ្ហាប្រឈមនយោបាយនិងផ្លូវច្បាប់ ត្រូវតែត្រូវបានឆ្លើយតបដោយអ៊ុយក្រែន» ។ ការបោះឆ្នោតក្នុងពេលសង្គ្រាមត្រូវបានហាមឃាត់ដោយច្បាប់ ប៉ុន្តែលោក Zelenskyy ដែលអាណត្តិរបស់លោកផុតកំណត់កាលពីឆ្នាំមុន កំពុងប្រឈមទៅនឹងសម្ពាធជាថ្មីពីលោក Trump ដើម្បីធ្វើការបោះឆ្នោត។ ប្រធានាធិបតីរុស្ស៊ី លោក Vladimir Putin បានរិះគន់ខ្លាំងៗលើលោក Zelenskyy ជាយូរមកហើយថាជាដៃគូចរចា «ខុសច្បាប់» ចំពោះការបរាជ័យក្នុងការរៀបចំការបោះឆ្នោត។