នាយករដ្ឋមន្ត្រីអូស្ត្រាលី លោក Anthony Albanese បានទទួលស្គាល់ថា យុវជនមួយចំនួននៅតែប្រើប្រាស់ប្រព័ន្ធផ្សព្វផ្សាយសង្គម មួយថ្ងៃបន្ទាប់ពីការហាមប្រាមលើកដំបូងលើអ្នកដែលមានអាយុក្រោម ១៦ ឆ្នាំបានចូលជាធរមាន ដោយនិយាយថា ការអនុវត្តន៍ដំបូងតែងតែមានភាពរអាក់រអួល ប៉ុន្តែនៅទីបំផុតនឹងជួយសង្គ្រោះជីវិត។

មួយថ្ងៃបន្ទាប់ពីច្បាប់នេះចូលជាធរមាន មតិប្រតិកម្មនៅលើប្រព័ន្ធផ្សព្វផ្សាយសង្គមអូស្ត្រាលីកើនឡើងយ៉ាងច្រើនលើសលប់ ដោយមតិយោបល់(comments)ពីមនុស្សដែលអះអាងថាមានអាយុក្រោម ១៦ ឆ្នាំ រួមទាំងមតិយោបល់ មួយនៅលើគណនី TikTok របស់នាយករដ្ឋមន្ត្រី ដែលនិយាយថា ខ្ញុំនៅតែនៅទីនេះ រង់ចាំរហូតដល់ខ្ញុំអាចបោះឆ្នោតបាន។  ក្រោមច្បាប់នេះវេទិកាធំៗចំនួន១០រួមទាំងTikTok,Instagramរបស់ក្រុមហ៊ុនមេMetaនិង YouTube របស់ក្រុមហ៊ុន Alphabet ត្រូវតែហាមប្រាមអ្នកប្រើប្រាស់ជាអនីតិជន ពុំនោះប្រឈមការពិន័យរហូតដល់៤៩,៥ លានដុល្លារអូស្ត្រាលី ។ រដ្ឋាភិបាលបាននិយាយកាលពីកន្លងទៅថា ខ្លួននឹងត្រូវការពេលវេលាខ្លះសម្រាប់វេទិកាទាំងនេះក្នុងការបង្កើតដំណើរការដើម្បីធ្វើដូច្នេះ។

លោក Albanese បានប្រាប់វិទ្យុ FOX ថា ជាការពិតណាស់ វាមិនរលូនទេ។ អ្នកមិនអាចបិទគណនីជាងមួយលាននៅទូទាំងប្រទេសក្នុងរយៈពេលមួយថ្ងៃបានទេ។ ប៉ុន្តែវាកំពុងកើតឡើង។ថ្លែងប្រាប់វិទ្យុ Nova ក្នុងទីក្រុងស៊ីដនី លោកបានបន្ថែមថា បើវាងាយស្រួល គេប្រាកដជាធ្វើហើយ។  

រដ្ឋាភិបាលនានានៅជុំវិញពិភពលោកបាននិយាយថា ពួកគេនឹងតាមដានការអនុវត្តន៍នេះនៅប្រទេសអូស្ត្រាលី ខណៈពួកគេថ្លឹងថ្លែងថាតើត្រូវធ្វើអ្វីស្រដៀងគ្នាឬអត់។ កាសែត Nine បានរាយការណ៍ថា សមាជិកព្រឹទ្ធសភាបក្សសាធារណរដ្ឋអាមេរិក លោក Josh Hawley បានគាំទ្របម្រាមនេះខណៈចូលជាធរមាន៕