អ៊ីស្រាអែលបានផ្តល់ការអនុញ្ញាតសម្រាប់ការសាងសង់ផ្ទះចំនួន ៧៦៤ ខ្នងបន្ថែមទៀតក្នុងការតាំងទីលំនៅខុសច្បាប់ចំនួនបីទីតាំងក្នុងតំបន់ West Bank ជាការសម្រេចចិត្តមួយដែលទំនងជានឹងបង្កើនភាពតានតឹងបន្ថែមទៀត ខណៈក្រុមឃ្លាំមើលសិទ្ធិមនុស្ស បានចោទប្រកាន់រដ្ឋាភិបាលអ៊ីស្រាអែលថាបានឈានទៅរកការដាក់បញ្ចូលទឹកដីប៉ាឡេស្ទីនជាឧបសម្ព័ន្ធតាមជាក់ស្ដែង។  

រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក Bezalel Smotrich បាននិយាយកាលពីថ្ងៃពុធថា ក្រុមប្រឹក្សាផែនការជាន់ខ្ពស់ ដែលជាស្ថាប័នទទួលបន្ទុកផែនការសាងសង់ការតាំងទីលំនៅ ក្នុងតំបន់ West Bank បានអនុម័តលំនៅដ្ឋានជាង៧០០ ខ្នងក្នុងការតាំងទីលំនៅ លើតំបន់ Hashmonaim, Beitar Illit និង Givat Ze'ev ជាប់ៗគ្នា។

លោកបាននិយាយក្នុងសេចក្តីថ្លែងការណ៍ថា ការសម្រេចចិត្តកាលពីថ្ងៃពុធបានដាក់ចំនួនសរុបនៃអង្គភាពលំនៅដ្ឋានដែលត្រូវបានអនុម័តក្នុងតំបន់ West Bank ចាប់តាំងពីលោក Smotrich ឡើងកាន់តំណែង ដល់ ៥១.៣៧០ ខ្នង។

ការតាំងទីលំឋាននិគមជនទាំងនេះត្រូវបានសហគមន៍អន្តរជាតិភាគច្រើនគិតថាខុសច្បាប់ក្រោមច្បាប់អន្តរជាតិ ហើយក្រុមប្រឹក្សាសន្តិសុខអង្គការសហប្រជាជាតិបានអនុម័តសេចក្តីសម្រេចជាច្រើនប្រឆាំងនឹងការពង្រីករបស់ពួកគេ។

លោក Nabil Abu Rudeineh អ្នកនាំពាក្យរបស់ប្រធានអាជ្ញាធរប៉ាឡេស្ទីន លោក Mahmoud Abbas បានថ្កោលទោសសកម្មភាពនេះ ដោយនិយាយថាការអនុម័តនេះគឺជាផ្នែកមួយនៃគោលនយោបាយតាំងទីលំនៅដែលមានគោលបំណងបំផ្លិចបំផ្លាញតំបន់នេះ និង រុញឲ្យធ្លាក់ក្នុងវដ្តនៃអំពើហិង្សា និងសង្គ្រាម៕