កូរ៉េខាងត្បូង និងជប៉ុន បានប្រតិកម្មយ៉ាងខ្លាំងកាលពីថ្ងៃពុធសប្ដាហ៍នេះ បន្ទាប់ពីយន្តហោះយោធាចិន និងរុស្ស៊ី បានធ្វើការល្បាតរួមគ្នាជុំវិញប្រទេសទាំងពីរ ដោយទាំងទីក្រុងសេអ៊ូល និងតូក្យូបានប្រញាប់ប្រញាល់បញ្ជូនយន្តហោះរបស់ខ្លួន។

កូរ៉េខាងត្បូងបាននិយាយថា ខ្លួនបានដាក់ការតវ៉ាជាមួយតំណាងចិន និងរុស្ស៊ី ខណៈជប៉ុនបាននិយាយថា ខ្លួនបានបង្ហាញពីការព្រួយបារម្ភខ្លាំងលើសន្តិសុខជាតិ។

យោងតាមទីក្រុងតូក្យូ យន្តហោះទម្លាក់គ្រាប់បែក Tu-95 របស់រុស្ស៊ីពីរគ្រឿងកាលពីថ្ងៃអង្គារបានហោះចេញពីសមុទ្រជប៉ុន ដើម្បីជួបជាមួយយន្តហោះទម្លាក់គ្រាប់បែក H-6 របស់ចិនពីរគ្រឿងនៅសមុទ្រចិនខាងកើត បន្ទាប់មកបានធ្វើការហោះហើររួមគ្នាជុំវិញប្រទេសនេះ។

ហេតុការណ៍នេះកើតឡើងខណៈជប៉ុនកំពុងជាប់គាំងក្នុងជម្លោះជាមួយចិនជុំវិញការអត្ថាធិប្បាយរបស់លោកស្រីនាយករដ្ឋមន្ត្រី Sanae Takaichi ពាក់ព័ន្ធបញ្ហាកោះតៃវ៉ាន់។

រដ្ឋមន្ត្រីក្រសួងការពារជាតិជប៉ុនលោក Shinjiro Koizumi បានសរសេរលើបណ្ដាញ X កាលពីថ្ងៃពុធថា ការហោះហើររួមគ្នារបស់យន្តហោះទម្លាក់គ្រាប់បែកទាំងនេះមានបំណងយ៉ាងច្បាស់ថាជាការបង្ហាញកម្លាំងប្រឆាំងនឹងប្រទេសរបស់លោក។

ទីក្រុងសេអ៊ូល បាននិយាយកាលពីថ្ងៃអង្គារថា យន្តហោះចម្បាំងរុស្ស៊ី និងចិន បានចូលទៅក្នុងតំបន់ការពារដែនអាកាសរបស់ខ្លួន ។

ជប៉ុន និយាយថា យន្តហោះទម្លាក់គ្រាប់បែកមានសមត្ថភាពបំពាក់នុយក្លេអ៊ែរអាមេរិកបានហោះហើរលើសមុទ្រជប៉ុនអមដំណើរជាមួយយន្តហោះចម្បាំងជប៉ុនកាលពីថ្ងៃពុធជាការបង្ហាញកម្លាំងក្រោយចិន និងរុស្ស៊ីធ្វើសមយុទ្ធលើអាកាសនិងសមុទ្រជុំវិញជប៉ុន និងកូរ៉េខាងត្បូង៕