កងកម្លាំងបណ្ដោះអាសន្នរបស់អង្គការសហប្រជាជាតិនៅលីបង់ (UNIFIL) បាននិយាយកាលពីថ្ងៃពុធថា កងកម្លាំងអ៊ីស្រាអែល បានបាញ់ទៅលើកងកម្លាំងរក្សាសន្តិភាពដែលកំពុងល្បាតនៅតំបន់ខ្សែបន្ទាត់ពណ៌ខៀវនៅភាគខាងត្បូងប្រទេសលីបង់កាលពីថ្ងៃអង្គារ ដោយហៅឧប្បត្តិហេតុនេះថា ជា «ការរំលោភបំពានយ៉ាងធ្ងន់ធ្ងរ»លើសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខUN។

UNIFIL បានអះអាងថា រថក្រោះ Merkava នៅជិតទីក្រុង Sarda បានបាញ់កាំភ្លើងយន្តចំនួន ១០គ្រាប់ ទៅលើក្បួនរថយន្តរបស់កងកម្លាំងរក្សាសន្តិភាព បន្ទាប់មកមានការបាញ់ប្រហារចំនួន ១០គ្រាប់បន្ថែម ទៀតនៅក្បែរនោះ។ ទាំងកងកម្លាំងរក្សាសន្តិភាព និងរថក្រោះ គឺស្ថិតនៅក្នុងទឹកដីលីបង់ នៅពេលនោះ។ ពុំមានការរាយការណ៍អំពីអ្នករងរបួសទេ។

កងកម្លាំងរក្សាសន្តិភាពបានទាក់ទងកងកម្លាំងការពារអ៊ីស្រាអែល (IDF) ភ្លាមៗ តាមរយៈបណ្តាញទំនាក់ទំនងរបស់ UNIFIL ដើម្បីបញ្ឈប់ការបាញ់ប្រហារ។ UNIFIL បានកត់សម្គាល់ថា IDF ត្រូវបានជូនដំណឹងជាមុនអំពីទីតាំង និងពេលវេលានៃការល្បាត ស្របតាមនីតិវិធីស្តង់ដាសម្រាប់ប្រតិបត្តិការ នៅក្នុងតំបន់ងាយរងគ្រោះនៅជិតខ្សែបន្ទាត់ពណ៌ខៀវ។

UNIFIL បាននិយាយថា៖«ការវាយប្រហារលើ ឬនៅជិតកងកម្លាំងរក្សាសន្តិភាព គឺជាការរំលោភបំពានយ៉ាងធ្ងន់ធ្ងរលើសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខ» ដោយអំពាវនាវឲ្យកងកម្លាំង IDF បញ្ឈប់អាកប្បកិរិយាឈ្លានពានណាមួយជាបន្ទាន់៕