ក្រសួងសន្តិសុខមាតុភូមិ បានបង្ហាញថា រដ្ឋាភិបាលសហរដ្ឋអាមេរិក មានផែនការទិញយន្តហោះជាច្រើនគ្រឿងសម្រាប់ការធ្វើនិរទេសជនអន្តោប្រវេសន៍ ខណៈរដ្ឋាភិបាលកំពុងបង្កើនការបង្ក្រាបលើការធ្វើអន្តោប្រវេសន៍ខុសច្បាប់ ដែលជាគោលនយោបាយអាទិភាពរបស់លោកប្រធានាធិបតី Donald Trump ។

កាសែត Washington Post បានរាយការណ៍ថា ក្រសួងបានចុះហត្ថលេខាលើកិច្ចសន្យាមានតម្លៃជិត ១៤០លានដុល្លារដើម្បីទិញយន្តហោះ Boeing 737 ចំនួន៦គ្រឿងសម្រាប់គោលបំណងនេះ។

ក្រសួងនិយាយថា អាជ្ញាធរអន្តោប្រវេសន៍បានពឹងផ្អែកជាយូរមកហើយលើយន្តហោះជួល ដើម្បីអនុវត្តជើងហោះហើរធ្វើនិរទេស។

មន្ត្រីជាន់ខ្ពស់ម្នាក់របស់ក្រសួងបាននិយាយថា ការទិញយន្តហោះផ្ទាល់ខ្លួននឹង«មានប្រសិទ្ធភាពក្នុងការចំណាយ» សម្រាប់ការធ្វើនិរទេសទ្រង់ទ្រាយធំ។ មន្ត្រីរូបនោះបាននិយាយបន្ថែមថា លោក Trump «ប្តេជ្ញាចិត្តក្នុងការនាំជនបរទេសខុសច្បាប់ចេញពីប្រទេសឲ្យបានឆាប់រហ័ស និងមានប្រសិទ្ធភាព»។

គោលនយោបាយអន្តោប្រវេសន៍របស់លោក Trump ជារឿយៗបានបង្កឱ្យមានភាពចម្រូងចម្រាស។