រដ្ឋមន្ត្រីការបរទេសវ៉េណេស៊ុយអេឡា លោក Yvan Gil បាននិយាយកាលពីថ្ងៃអង្គារថា រដ្ឋាភិបាលសហរដ្ឋអាមេរិកកំពុងធ្វើ «សង្គ្រាមចិត្តសាស្ត្រ» ប្រឆាំងនឹងប្រទេសវ៉េណេស៊ុយអេឡា បន្ទាប់ពីការដាក់ទណ្ឌកម្មសេដ្ឋកិច្ចរបស់ខ្លួន បានបរាជ័យ។ 

លោក Gil បាននិយាយក្នុងអំឡុងពេលបើកសម័យប្រជុំសភាប្រជាជន ដើម្បីសន្តិភាព និងអធិបតេយ្យភាពនៃអាមេរិករបស់យើង ដែលជាព្រឹត្តិការណ៍មួយដែលបានប្រារព្ធឡើងនៅទីក្រុងការ៉ាកាសថា៖«ឥឡូវនេះពួកគេកំពុងងាកទៅរកសង្គ្រាមចិត្តសាស្ត្រ និងសង្គ្រាមចិត្តសាស្ត្រយោធា»។

លោកបានអះអាងថា ជាផ្នែកមួយនៃយុទ្ធសាស្ត្រថ្មីរបស់ខ្លួន សហរដ្ឋអាមេរិកកំពុងប្រើប្រាស់ «អំណាចសេដ្ឋកិច្ច អំណាចយោធា និងលើសពីនេះទៅទៀត អំណាចប្រព័ន្ធផ្សព្វផ្សាយ ដើម្បីធ្វើសង្គ្រាមចិត្តសាស្រ្តដែលមិនធ្លាប់មានពីមុនមក» ប្រឆាំងនឹងវ៉េណេស៊ុយអេឡា និងតំបន់នេះ។

លោក Gil បាននិយាយថា យើងកំពុងជួបប្រទះ«បញ្ហាប្រឈមដ៏សំខាន់មួយ នៅក្នុងប្រវត្តិសាស្ត្រនៃសាធារណរដ្ឋរបស់យើង នៅក្នុងតំបន់របស់យើង» ដោយបន្ថែមថា ប្រតិភូជាង ៥០០នាក់ មកពីប្រទេសប្រហែល ៥០ នៅទូទាំងទ្វីបទាំងអស់ កំពុងចូលរួមក្នុងកិច្ចប្រជុំនេះ។

លោក Gil បានលើកឡើងថា ព្រឹត្តិការណ៍ ដែលរៀបចំឡើងដោយក្រុមប្រឹក្សាជាតិសម្រាប់អធិបតេយ្យភាព និងសន្តិភាពនៃប្រទេសវេណេស៊ុយអេឡា នឹងផ្តោតលើបញ្ហាសំខាន់ៗដូចជា ការគំរាមកំហែងផ្នែកយោធារបស់សហរដ្ឋអាមេរិក ឧក្រិដ្ឋកម្មឆ្លងដែននៅក្នុងតំបន់ និងគោលលទ្ធិ Monroe ដែលជាគោលនយោបាយដែលត្រូវបានស្តារឡើងវិញដោយទីក្រុងវ៉ាស៊ីនតោន ដើម្បី «បង្កើតការត្រួតត្រា» នៅក្នុងតំបន់។

ចាប់តាំងពីចុងខែសីហាមក សហរដ្ឋអាមេរិកបានរក្សាវត្តមានយោធាយ៉ាងច្រើន នៅក្នុងតំបន់ការ៉ាអ៊ីប ដោយពណ៌នាថា វាជាផ្នែកមួយនៃកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងការជួញដូរគ្រឿងញៀន ដែលប្រទេសវ៉េណេស៊ុយអេឡាបានចោទថា ជាការប៉ុនប៉ងរៀបចំការផ្លាស់ប្តូររបបនៅក្នុងប្រទេសអាមេរិកខាងត្បូងនេះ៕