នៅថ្ងៃព្រហស្បតិ៍ (ទី១១ ខែធ្នូ) នេះ បុគ្គលិកជំនួយនៅនឹងកន្លែង បានប្រាប់ឲ្យដឹងថា ការវាយប្រហារតាមផ្លូវអាកាសរបស់យោធាមីយ៉ាន់ម៉ា បានសម្លាប់មនុស្សយ៉ាងតិចបំផុត ៣១នាក់ នៅមន្ទីរពេទ្យមួយកន្លែង ខណៈដែលរបបយោធាបង្កើនការវាយលុកយ៉ាងខ្លាំងក្លា នៅមុនការបោះឆ្នោតដែលត្រូវចាប់ផ្តើមនៅខែធ្នូនេះ។

ស្ថាប័នឃ្លាំមើលជម្លោះ បានឲ្យដឹងថា របបយោធាបានបង្កើនការវាយប្រហារតាមអាកាសបើធៀបនឹងឆ្នាំមុនៗ ចាប់តាំងពីការចាប់ផ្តើមនៃសង្រ្គាមស៊ីវិលរបស់សហភាពមីយ៉ាន់ម៉ា ក្រោយការដណ្តើមអំណាចដោយរដ្ឋប្រហារ ក្នុងឆ្នាំ២០២១ បញ្ចប់ការពិសោធន៍អនុវត្តលទ្ធិប្រជាធិបតេយ្យរយៈពេលមួយទសវត្សរ៍។

បុគ្គលិកផ្ដល់ជំនួយនៅនឹងកន្លែង ឈ្មោះ Wai Hun Aung បាននិយាយថា យន្តហោះយោធា ១គ្រឿង បានទម្លាក់គ្រាប់បែកលើមន្ទីរពេទ្យព្យាបាលជំងឺទូទៅរបស់ទីក្រុង Mrauk-U នៅភាគខាងលិចរដ្ឋ Rakhine ជាប់ព្រំដែនប្រទេសបង់ក្លាដែស កាលពីល្ងាចថ្ងៃទី១០ ខែធ្នូ។

លោកបានបន្ថែមថា៖ «ស្ថានការណ៍ គឺអាក្រក់ណាស់។ សម្រាប់ពេលនេះ យើងអាចបញ្ជាក់ថា មានអ្នកស្លាប់ចំនួន ៣១នាក់យ៉ាងតិច ហើយយើងគិតថា នឹងមានអ្នកស្លាប់ថែមទៀត។ ក៏មានអ្នករបួសចំនួន ៦៨នាក់ដែរ ហើយនឹងមានកាន់តែច្រើនថែមទៀត»។

យ៉ាងហោចណាស់សាកសពត្រូវបានគ្របចំនួន ២០នាក់ ត្រូវបានគេឃើញនៅខាងក្រៅមន្ទីរពេទ្យ នាពេលយប់។ អ្នកនាំពាក្យរបបយោធា មិនអាចទាក់ទងបានភ្លាមៗឡើយ ដើម្បីសុំការអត្ថាធិប្បាយ។

យោធាបានកំណត់ការបោះឆ្នោតចាប់ពីថ្ងៃទី២៨ ខែធ្នូ ដោយចាត់ទុកការបោះឆ្នោតនេះថា ជាការសម្រាលការប្រយុទ្ធគ្នា ប៉ុន្តែក្រុមឧទ្ទាមបានសន្យាថា នឹងរារាំងដំណើរការ នៅលើដែនដីដែលពួកគេគ្រប់គ្រង ជាទីដែលរបបយោធា កំពុងប្រយុទ្ធ ដើម្បីដណ្តើមកាន់កាប់វិញ៕